ពិនិត្យកម្រិតជាតិស្ករក្នុងឈាម ទាំងនេះជារបៀបពិនិត្យឲ្យបានត្រឹមត្រូវ

១. ឧបករណ៍ចាំបាច់សម្រាប់វាស់កម្រិតជាតិស្ករក្នុងឈាម

ឧបករណ៍វាស់កម្រិតជាតិស្ករ
ជាឧបករណ៍អេឡិចត្រូនិកដែលប្រើសម្រាប់វាស់កម្រិតជាតិស្ករក្នុងឈាមថាតើមានកម្រិតប៉ុន្មាន។ ឧបករណ៍នេះអាចវាស់ជាតិស្ករក្នុងឈាមឲ្យដឹងដោយត្រូវការឈាមពីចុងម្រាមដៃប៉ុណ្ណោះ។ គួរថែរក្សា និងប្រើប្រាស់តាមការណែនាំរបស់ក្រុមហ៊ុនផលិត ដែលការប្រើប្រាស់មានភាពខុសគ្នាពីប្រភេទឧបករណ៍មួយទៅឧបករណ៍មួយផ្សេងទៀត។ ដើម្បីប្រើប្រាស់ឲ្យបានត្រឹមត្រូវ យើងត្រូវពិនិត្យមើលការណែនាំពីរបៀបប្រើប្រាស់ របៀបទុកដាក់ ដោយខ្លួនឯង ឬសាកសួរគ្រូពេទ្យ ដើម្បីឲ្យកាន់តែច្បាស់។

បន្ទះតេស្
បន្ទះតេស្តជាតិស្ករត្រូវប្រើជាមួយឧបករណ៍វាស់កម្រិតជាតិស្ករដែលផលិតមកជាមួយគ្នាប៉ុណ្ណោះ ហើយបន្ទះនេះមិនអាចប្រើលើសពីម្ដងទេ។ មានន័យថា យើងត្រូវយកបន្ទះថ្មីមកប្រើ រាល់ពេលវាស់កម្រិតជាតិស្ករក្នុងឈាមជាថ្មី។ បន្ថែមពីនេះ ហាមប្រើបន្ទះតេស្តជាតិស្ករដែលផុតសុពលភាពដាច់ខាត ព្រោះវាអាចផ្ដល់លទ្ធផលមិនត្រឹមត្រូវ។ បន្ទះនេះត្រូវរក្សាទុកតាមការណែនាំ និងហាមរក្សានៅក្នុងទូរទឹកកក។

ប្រដាប់ជោះឈាម
ប្រដាប់ជោះឈាមនេះ មានម្ជុលនៅខាងចុង ដែលអាចជោះយកឈាមពីចុងម្រាមដៃយើងបាន ដើម្បីយកទៅពិនិត្យកម្រិតជាតិស្ករ។

២. ពេលណា និងញឹកញាប់ប៉ុនណាដែលយើងគួរវាស់កម្រិតជាតិស្ករក្នុងឈាម?

យើងត្រូវធ្វើតេស្តពិនិត្យកម្រិតជាតិស្ករក្នុងឈាមយ៉ាងតិចពី ២–៤ដងក្នុងមួយថ្ងៃ និងត្រូវកត់ត្រាលទ្ធផលឲ្យបានល្អ។ ពេលវេលាល្អបំផុតដែលត្រូវតេស្ដគឺ៖
១. ពេលយើងភ្ញាក់ពីគេង និងមុនញ៉ាំអាហារពេលព្រឹក
២. មុនពេលញ៉ាំអាហារថ្ងៃត្រង់
៣. មុនពេលញ៉ាំអាហារពេលល្ងាច និង
៤. មុនពេលចូលគេង។”

ករណីមិនស្រួលខ្លួន(ឈឺ) យើងត្រូវវាស់ជាតិស្ករញឹកញាប់ជាងធម្មតា ឬក្នុងករណីដែលមានការផ្លាស់ប្ដូរផែនការព្យាបាលជំងឺទឹកនោមផ្អែម ឬ ទម្លាប់រស់នៅប្រចាំថ្ងៃរបស់យើង។ ការមិនអាចគ្រប់គ្រងកម្រិតជាតិស្ករក្នុងឈាមបាន មិនត្រឹមតែបង្កឲ្យមានបញ្ហារយៈពេលខ្លីដូចជា កម្រិតជាតិស្ករក្នុងឈាមចុះទាបទេ នៅអាចបង្កគ្រោះថ្នាក់ដល់អាយុជីវិត ដូចជា ករណី diabeticketoacidosis (ករណីកើនជាតិអាស៊ីដក្នុងឈាម ដោយសារបរិមាណជាតិស្ករក្នុងឈាមខ្ពស់ក្នុងរយៈពេលយូរ) និងអាចធ្វើឲ្យយើងសន្លប់ដោយសារជាតិស្ករក្នុងឈាមឡើងខ្ពស់ទៀតផង(diabetic coma )។

៣. របៀបវាស់កម្រិតជាតិស្ករ

១. លាងសម្អាតដៃ និងសម្ងួតដៃរបស់យើងឲ្យស្អាត
២. ដាក់បន្ទះតេស្តជាតិស្ករចូលទៅក្នុងឧបករណ៍វាស់ជាតិស្ករ
៣. យកប្រដាប់ជោះឈាមមកជោះលើចុងម្រាមដៃរបស់យើង
៤. ដាក់ដំណក់ឈាមលើបន្ទះវាស់ជាតិស្កររហូតឈាមជ្រាបចូលបានល្អ
៥. រង់ចាំប៉ុន្មានវិនាទី ឧបករណ៍នេះនឹងបង្ហាញលទ្ធផលលើអេក្រង់
៦. កត់ត្រាលទ្ធផលតេស្តជាតិស្ករនេះក្នុងកូនសៀវភៅទុកឲ្យបានល្អ
៧. បោះចោលប្រដាប់ជោះឈាម និងបន្ទះវាស់ជាតិស្ករឲ្យបានត្រឹមត្រូវ និងរក្សាឧបករណ៍វាស់កម្រិតជាតិស្ករឲ្យបានស្រួលបួល។

ចំណាំ៖ យើងមិនគួរជោះឈាមពីម្រាមដៃដដែលៗទេ ហើយដើម្បីកុំឲ្យមានអារម្មណ៍ថាឈឺពេលជោះឈាម យើងអាចជោះត្រង់ចំហៀងចុងម្រាមដៃ។

៤. របៀបមើលលទ្ធផល

កម្រិតជាតិស្ករក្នុងឈាមដែលល្អគឺនៅចន្លោះ ៥–១០ មិល្លីម៉ូល/លីត្រ (៩០ – ១៨០ មិល្លីលិក្រាម/ដេស៊ីលីត្រ)
កម្រិតជាតិស្ករក្នុងឈាមដែលល្អគឺមានកម្រិតខុសៗគ្នាទៅតាមបុគ្គលសម្នាក់ៗ។ ដូចនេះ យើងត្រូវពិគ្រោះជាមួយគ្រូពេទ្យអំពីកម្រិតជាតិស្ករថាចំនួនប៉ុន្មានដែលល្អសម្រាប់យើង។
បើសិនជាលទ្ធផលជាតិស្ករក្នុងឈាមរបស់យើងក្រោម ៥ មលីលិម៉ូល/លីត្រ (៩០មិល្លីក្រាម/ដេស៊ីលីត្រ) នោះបង្ហាញថាកម្រិតជាតិស្ករក្នុងឈាមទាប។ ដូចនេះដើម្បីដឹងថាកម្រិតជាតិស្ករក្នុងឈាមទាបមានផលប៉ះពាល់យ៉ាងម៉េច យើងត្រូវទៅអានព័ត៌មានបន្ថែម ដែលនិយាយពីរឿងនេះ។
ពេលខ្លះទៀតលទ្ធផលអាចចេញមកលើស ឬប្រហែល ៥មិលីលិម៉ូល/លីត្រ (៩០ មិល្លីក្រាម/ដេស៊ីលីត្រ) តែក៏នៅតែ ចាត់ទុកថាមានកម្រិតជាតិស្ករក្នុងឈាមទាបដែរ។
ក្នុងករណីកម្រិតជាតិស្ករក្នុងឈាមមានកម្រិតខ្ពស់មុនពេលញ៉ាំអាហារ នោះមានន័យថាដំណើរការនៃកម្រិតអាំងស៊ុយលីនក៏ប្រហែលជាទាបដែរ។
ផ្ទុយទៅវិញក្នុងករណីកម្រិតជាតិស្ករក្នុងឈាមមានកម្រិតទាបមុនពេលញ៉ាំអាហារ នោះមានន័យថាដំណើរការនៃកម្រិតអាំងស៊ុយលីន ក៏ប្រហែលជាខ្ពស់ដែរ។
ក្នុងករណីដែលពេលខ្លះកម្រិតជាតិស្ករក្នុងឈាមខ្ពស់ និងពេលខ្លះទៀត ទាបមុនពេលញ៉ាំអាហារ នោះអាចមកពីមូលហេតុច្រើនដូចជាបរិមាណអាំងស៊ុយលីន របបអាហារដែលយើងញ៉ាំ និងការហាត់ប្រាណជាដើម។ បើមានករណីនេះ យើងគួរទៅពិគ្រោះជាមួយគ្រូពេទ្យ។