ការរស់នៅជាមួយជំងឺទឹកនោមផ្អែមប្រភេទ១ (T1D) អាចមានឥទ្ធិពលលើទំនាក់ទំនងរបស់យើងជាមួយគ្រួសារ មិត្តភ័ក្តិ ឬដៃគូស្នេហា។

ការគ្រប់គ្រង T1D ជាមួយគ្រួសារ មិត្តភ័ក្តិ និងដៃគូស្នេហា អាចជួយឱ្យយើងមិនសូវមានអារម្មណ៍ឯកោ។  ភាពជិតស្និទ្ធ និងទំនាក់ទំនងដែលមានស្រាប់ កាន់តែល្អប្រសើរ។

ការប្រាស្រ័យទាក់ទងគ្នាជាប្រចាំ និងបើកចំហ មិនថាក្នុងទំនាក់ទំនងណាមួយ សំខាន់ដើម្បី គាំទ្រលើកទឹកចិត្តគ្នាទៅវិញទៅមក។

ការយល់ដឹងពីសម្ពាធដែល T1D អាចមាន ថែមលើទំនាក់ទំនងរបស់យើង ព្រមទាំងបញ្ហាទូទៅដែលអាចកើតមានឡើង នឹងជួយឱ្យយើងអាចគ្រប់គ្រងគ្រាលំបាកៗក្នុងទំនាក់ទំនងរបស់យើងបានប្រសើរជាងមុន។

១. ទំនាក់ទំនងគ្រួសារ និងជំងឺទឹកនោមផ្អែមប្រភេទ១

បងប្អូនអន់ចិត្ត ច្រណែន

• មានជំងឺទឹកនោមផ្អែមប្រភេទ១ (T1D) អាចមានន័យថា ឪពុកម្ដាយយកចិត្តទុកដាក់លើយើង ច្រើនលើសពីសមាជិកផ្សេងទៀត ដោយសារត្រូវជូនយើងទៅមន្ទីរពេទ្យផង មើលថែទាំយើងផង។ ដូច្នេះបងប្អូនយើង អាចមានអារម្មណ៍អន់ចិត្ត​ ថាប៉ាម៉ាក់មិនរវីរវល់ ហើយមិនសប្បាយចិត្តដោយសារតែរឿងនេះ។
• អាចមានអារម្មណ៍អយុត្តិធម៌ នៅពេលដែលសមាជិកគ្រួសារតឹងតែងលើយើង ដូចជា កំណត់អ្វីត្រូវញ៉ាំ និងអ្វីៗផ្សេងទៀតយើងត្រូវធ្វើ ដើម្បីគ្រប់គ្រង T1D ឱ្យបានល្អ។ សូមចាំថា ទាំងអស់នេះគឺជាក្តីស្រឡាញ់ ហើយពួកគេចង់ឱ្យយើងមានសុខភាពល្អ និងសប្បាយរីករាយ។
• សូមឱ្យបងប្អូនចូលរួមក្នុងការគ្រប់គ្រង T1D របស់យើង ហើយហៅពួកគេជូនទៅមន្ទីរពេទ្យ ដើម្បីកាន់តែយល់ចិត្តគ្នា!
• សូមណែនាំវិបសាយ និងហ្វេសប៊ុកផេក HelloType1 ឱ្យពួកគេយល់ពី T1D កាន់តែច្រើន និងដឹងផលលំបាកដែលយើងកំពុងមានលើខ្លួនយើង។

ឪពុកម្តាយបែកបាក់គ្នា

• មានឪពុកម្តាយបែកបាក់គ្នា ពិបាកក្នុងការយល់គ្នានៅក្នុងគ្រួសារ នោះវាអាចពិបាកក្នុងការគ្រប់គ្រង ទាំងផ្លូវកាយ ទាំងផ្លូវចិត្ត។
• ត្រូវប្រាកដថា​ យើងមានថ្នាំ ឬឧបករណ៍គ្រប់គ្រងជំងឺទឹកនោមផ្អែមទាំងអស់នៅតាមខ្លួន។ យករបស់ទាំងនោះទៅផ្ទះទាំងសងខាង។ ឪពុកម្តាយ គួរជួយក្នុងរឿងនេះ។
• កត់ត្រាទុកលទ្ធផលជាតិស្ករក្នុងឈាម និងកម្រិតដូសអាំងស៊ុយលីនក្នុងសៀវភៅកំណត់ហេតុប្រចាំថ្ងៃ ដើម្បីឱ្យឪពុកម្តាយមានព័ត៌មានត្រឹមត្រូវ។យលីនក្នុងសៀវភៅកំណត់ហេតុប្រចាំថ្ងៃ ដើម្បីឱ្យឪពុកម្តាយមានព័ត៌មានត្រឹមត្រូវ។

គ្រួសារធំ

• ពេលយើងត្រូវបានធ្វើរោគវិនិច្ឆ័យឃើញថាមាន T1D លោកតាលោកយាយ មីងពូ បងប្អូនសាច់ញាតិយើង ជាទូទៅមិនសប្បាយចិត្ត និងព្រួយបារម្ភផងដែរ។
• សមាជិកគ្រួសារធំមួយចំនួនអាចមានការយល់ច្រឡំ មិនដឹងថា T1D ជាអ្វី និងមានន័យយ៉ាងណា ជាពិសេសបើពួកគេមកពីជំនាន់ខុសគ្នា ឬវប្បធម៌ផ្សេងគ្នា។
• សូមណែនាំវិបសាយ និងហ្វេសប៊ុកផេក HelloType1 ដើម្បីឱ្យពួកគេបានអាន ស្ដាប់ ដឹងពីអ្វីជា T1D និងថាតើវាមានន័យយ៉ាងណាសម្រាប់យើង។
• ចួនកាល យើងអាចហត់ក្នុងពន្យល់ឱ្យគ្រប់គ្នាយល់ យើងអាចប្រើ HelloType1 ជាជំនួយ។

២. ទំនាក់ទំនងផ្សេងទៀត និងជំងឺទឹកនោមផ្អែមប្រភេទ១

ទំនាក់ទំនងស្នេហា

• មានបញ្ហាសុខភាព ដូចជាជំងឺទឹកនោមផ្អែមប្រភេទ១ មិនមានន័យថាអ្នកមិនអាចមានទំនាក់ទំនងស្នេហានោះទេ។
• ត្រូវស្មោះត្រង់ជាមួយដៃគូអំពីស្ថានភាពសុខភាពយើង។ ប្រតិកម្មរបស់គេអាចប្រាប់យើង ថាតើគេពិតជាសាកសម សម្រាប់ឲ្យយើងបន្តទៅមុខជាមួយដែរឬទេ។
• រកដៃគូដែលបើកចំហស្វែងយល់ពី T1D ដើម្បីឲ្យ ដៃគូយើងអាចចូលរួមគ្រប់គ្រង T1D។
• ឱ្យដៃគូទៅពេទ្យជាមួយយើង ហើយណែនាំវិបសាយ និងហ្វេសប៊ុសផេក HelloType1 ដើម្បីឱ្យគេចូលរួមសហការគ្រប់គ្រង T1D ជាមួយយើង ។
• បើ​យើង​ចង់ យើង​អាច​រៀប​ការ និង​បង្កើត​គ្រួសារ​ដូច​អ្នក​ដទៃ​ដែរ។

មិត្តភ័ក្តិ

• មាន T1D មិនមែនមានន័យថា យើងមិនអាចមានមិត្តភ័ក្តិ មិនអាចចូលរួមក្នុងព្រឹត្តិការណ៍សង្គម និងសកម្មភាពសប្បាយៗបាននោះទេ។
• ភាពស្មោះត្រង់ជាមួយមិត្តភ័ក្តិ ជារឿងសំខាន់ ហើយប្រតិកម្មរបស់ពួកគេពេលដឹងថាយើងមាន T1D នឹងបញ្ជាក់ថាតើពួកគេនឹងក្លាយជាមិត្តល្អរបស់យើងដែរឬទេ។
• ប្រាប់មិត្ដជិតស្និទ្ធពី T1D និងការគ្រប់គ្រង។ ពួកគេអាចជួយ និងមើលថែយើង! ពួកគេគួរជាមនុស្សដែលមានការយោគយល់ និងចេះជួយគ្នា។
• ណែនាំវិបសាយ និងហ្វេសប៊ុកផេក HelloType1 ដើម្បីឱ្យពួកគេស្វែងយល់ និងចួលរួមគ្រប់គ្រង T1D របស់យើង។

ទោះបីជាមានជំងឺទឹកនោមផ្អែមប្រភេទ១ ក៏ដោយ យើងនៅតែអាចមានទំនាក់ទំនងល្អ សុភមង្គល និងស្នេហាជាមួយគ្រួសារ មិត្តភ័ក្តិ និងដៃគូរបស់យើងដូចអ្នកដទៃ។

សូមសុំជំនួយ និងទទួលយកការគាំទ្រពីក្រុមគ្រួសារ មិត្តភ័ក្តិ ដៃគូ និងក្រុមគ្រូពេទ្យ។ វាអាចកាត់បន្ថយភាពតានតឹង និងចែករំលែកបន្ទុកយើងបាន។ សូមចាំថា គ្រប់គ្នានៅក្បែរយើងជានិច្ច!