ប៉ាម៉ាក់ជួយកូនគ្រប់គ្រង់ជំងឺទឹកនោមផ្អែមប្រភេទ១ បែបណាពេលកូនមិនស្រួលខ្លួន?

១. ពេលកូនមិនស្រួលខ្លួនប៉ះពាល់អ្វីខ្លះដល់កម្រិតជាតិស្ករក្នុងឈាម?

កុមារដែលមានជំងឺទឹកនោមផ្អែមប្រភេទ១ អាចនឹងឈឺម្ដងម្កាលដូចក្មេងទូទៅដែរ។ ដោយសារតែជំងឺផ្សេងៗនេះ រាងកាយរបស់កូនយើងអាចបង្កឲ្យកើតឡើង ឬធ្លាក់ចុះកម្រិតជាតិស្ករក្នុងឈាម។ ដូចនេះហើយប៉ាម៉ាក់ត្រូវដឹងពីជំហានការពារបន្ថែមដើម្បីជួយកូនយើងអាចគ្រប់គ្រងកម្រិតជាតិស្ករក្នុងឈាមបាន។
កម្រិតជាតិស្ករនៅក្នុងឈាមអាចនឹងពិបាកក្នុងការទស្សន៍ទាយខ្លាំងណាស់នៅពេលដែលកូនឈឺ។ យើងមិនអាចដឹងទេថា ជំងឺទាំងនោះនឹងធ្វើឲ្យប៉ះពាល់ដល់ការគ្រប់គ្រងជំងឺទឹកនោមផ្អែមរបស់កូនយ៉ាងដូចម្ដេចនោះឡើយដែរ។ ដូចនេះហើយ វាជាការសំខាន់ដែលប៉ាម៉ាក់ត្រូវជួយពិនិត្យកម្រិតជាតិស្ករក្នុងឈាមកូនញឹកញាប់ជាងធម្មតា នៅថ្ងៃដែលកូនមានជំងឺ ឬមិនស្រួលខ្លួន និងកែតម្រូវកម្រិតអាំងស៊ុយលីនបើចាំបាច់។
នៅពេលកូនយើងមានជំងឺ ដូចជាផ្ដាសាយ ក្ដៅខ្លួន ឬជំងឺផ្សេងទៀត ទោះមាន ឬមិនមានគ្រុនក្រៅក្ដី នោះរាងកាយរបស់កូននឹងត្រូវការថាមពលបន្ថែមដើម្បីប្រឆាំងនឹងមេរោគ ហើយវាអាចធ្វើឲ្យរំខានដល់សកម្មភាពអាំងស៊ុយលីនដែលយើងចាក់ឲ្យកូន។
កោសិកាអាចនឹងត្រូវការអាំងស៊ុយលីនបន្ថែមដើម្បីធ្វើការ ឬត្រូវការអាំងស៊ុយលីនតិចជាងមុនដើម្បីធ្វើការ។ ការញ៉ាំអាហារ ផឹកទឹក ការត្រួតពិនិត្យកម្រិតជាតិស្ករក្នុងឈាម និងចាក់ថ្នាំអាំងស៊ុយលីន គឺចាំបាច់ខ្លាំងណាស់នៅពេលដែលកូនយើងឈឺ។
ប្រសិនបើកោសិកាមិនអាចទទួលបានថាមពលគ្រប់គ្រាន់នោះទេ ឬមិនមានអាំងស៊ុយលីនគ្រប់គ្រាន់ ដើម្បីជួយឲ្យជាតិស្ករចូលក្នុងកោសិកាទេនោះ រាងកាយរបស់កូននឹងបំបែកជាតិខ្លាញ់និងសាច់ដុំនៅក្នុងខ្លួនកូនយើង ដើម្បីផ្ដល់ជាថាមពល។ ដំណើរការដូចនេះ វានឹងផលិតសំណល់ដែលហៅថា សេតូន (Ketones) ដែលបង្កគ្រោះថ្នាក់ខ្លាំងនៅពេលដែលមានចំនួនច្រើន។
បើសិនជាការកើនឡើងកម្រិតជាតិស្ករមិនបានទទួលការព្យាបាល ជាតិសេតូននឹងវិវត្តន៍ទៅមុខ ហើយកូនយើងអាចនឹងកាន់តែឈឺខ្លាំង ដោយសារបញ្ហា Diabetic Ketoacidosis (DKA) ទោះបីជាមិនមានជំងឺអ្វីផ្សេងក៏ដោយ។

២. ប៉ាម៉ាក់ត្រូវត្រៀមខ្លួនជួយកូនបែបណាចំពោះបញ្ហានេះ?

ការដឹងវិធីគ្រប់គ្រងកម្រិតជាតិស្ករនៅពេលកូនឈឺ អាចជួយកូនចៀសផុតរពីបញ្ហាធំៗមួយចំនួន និងផលវិបាកផ្សេងៗ។
គោលដៅនៃការថែរទាំនៅពេលកូនឈឺរួមមាន៖

ការពារកុំឲ្យបាត់បង់ជាតិទឹក
ការពារកុំឲ្យមាន បញ្ហា Ketoacidosis (កម្រិតជាតិស្ករ និងសេតូនខ្ពស់នៅក្នុងឈាម)
ការពារពីបញ្ហាធ្លាក់ចុះកម្រិតជាតិស្ករក្នុងឈាមទាប (Hypoglycaemia)

៣. របៀបសម្គាល់ការកើតមានជាតិសេតូនក្នុងឈាម

ទាំងនេះគឺជារោគសញ្ញាខ្លះៗដែលប៉ាម៉ាក់គួរដឹងនៅពេលជាតិសេតូនក្នុងឈាមកូនត្រូវរាងកាយផលិតឡើង៖

ខ្យល់ដង្ហើម ធុំក្លិនដូចអាល់កុល
កម្រិតជាតិស្ករក្នុងឈាមកើនខ្ពស់
ទៅបន្ទប់ទឹកញឹកញាប់
ស្រេកទឹកគ្រប់ពេល
នឿយហត់ខ្លាំងជាងធម្មតា
ឈឺក្រពះ
ប្រែប្រួលចង្វាក់ដង្ហើម
វង្វេងវង្វាន់
សន្លប់
មានអារម្មណ៍ថាមិនស្រួលខ្លួន”

វិធីដែលល្អបំផុត គឺធ្វើតេស្តមើលជាតិសេតូន ដោយប្រើបន្ទះតេស្តមើលជាតិសេតូនក្នុងឈាម។ យើងអាចមិនមានបន្ទះតេស្ត និងម៉ាស៊ីនមើលជាតិសេតូនក្នុងឈាមនៅផ្ទះនោះទេ។ ដូចនេះប៉ាម៉ាក់គួរនាំកូនទៅមន្ទីពេទ្យ ឬគ្លីនិកទទួលបានការធ្វើតេស្តនេះ។

៤. ប៉ាម៉ាក់ត្រូវធ្វើម៉េចពេលកូនឈឺ?

សូមធ្វើតាមគោលការណ៍ណែនាំទូទៅខាងក្រោមនេះនៅពេលកូនយើងមានជំងឺ៖

មិនត្រូវឈប់ចាក់អាំងស៊ុយលីនដាច់ខាត
កម្រិតអាំងស៊ុយលីនប្រហែលជាអាចនឹងត្រូវបង្កើន ឬបន្ថយកម្រិត អាស្រ័យលើកម្រិតជាតិស្ករក្នុងឈាម (BG) និងអាហារដែលកូនយើងបានញ៉ាំ។
សូមបង្កើនការពិនិត្យមើលជាតិស្ករក្នុងឈាមរៀងរាល់ ៣ ទៅ ៤ម៉ោងម្ដង បើសិនជាមានបន្ទះតេស្តគ្រប់គ្រាន់។
បើសិនជាមិនអាចធ្វើតេស្តកម្រិតជាតិស្ករនៅក្នុងឈាមនៅផ្ទះទេ សូមទៅមន្ទីរពេទ្យដើម្បីអាចទទួលបានការធ្វើតេស្តទៀងទាត់។
ត្រូវប្រាកដថាកូនញ៉ាំទឹកបានច្រើន ។

ឧទាហរណ៍ជាតិទឹកដែលល្អចំពោះក្មេងអំឡុងពេលឈឺរួមមានទឹកសាបធម្មតា ទឹកស្រូវ Barley និងទឹកស៊ុប broth ជាដើម។ ប៉ាម៉ាក់ត្រូវជំរុញកូនផឹកទឹកតិចៗ ប្រហែលកន្លះពែងរៀងរាល់ម៉ោង។ ចៀសវាងភេសជ្ជៈដែលមានជាតិកាហ្វេអ៊ីន ដែលអាចបង្កឲ្យបាត់បង់ជាតិទឹកដូចជា ទឹកក្រូច តែ និងកាហ្វេ។

ព្យាបាលគ្រុនក្ដៅ
ប៉ាម៉ាក់ត្រូវជំរុញឲ្យកូនញ៉ាំអាហារក្នុងកម្រិតធម្មតា ប៉ុន្តែប្រសិនបើមិនអាចញ៉ាំបាន ត្រូវប្រាកដថា កូនបានញ៉ាំទឹក ឬអាហារដែលមានជាតិកាបូអ៊ីដ្រាតខ្លះ ដើម្បីការពារពីការធ្លាក់ចុះភ្លាមៗកម្រិតជាតិស្ករក្នុងឈាម។

ការពិនិត្យរកមើលជាតិសេតូននៅក្នុងទឹកនោម ឬឈាម គឺជារឿងចាំបាច់ណាស់។ ការបន្ថែមអាំងស៊ុយលីនជាទូទៅ គឺមានសារសំខាន់ដើម្បីគ្រប់គ្រងកម្រិតជាតិស្ករនៅក្នុងឈាម(លើកលែងតែ ជំងឺបង្កឲ្យធ្លាក់ចុះជាតិស្ករក្នុងឈាម)។

ករណីកូនយើងឡើងជាតិស្ករនៅក្នុងឈាមដោយគ្មាន ឬមានសេតូនតិចតួច ត្រូវចាក់អាំងស៊ុយលីន ៥ ទៅ ១០% នៃកម្រិតប្រើប្រចាំថ្ងៃសរុប ដោយប្រើអាំងស៊ុយលីនមានសកម្មភាពខ្លី ឬលឿន ហើយត្រូវបន្តចាក់ទៀតរៀងរាល់ ២ ទៅ ៤ម៉ោងម្ដង។

ករណីកូនយើងឡើងជាតិស្ករនៅក្នុងឈាមដោយមានជាតិសេតូនកម្រិតធម្យមឬ ច្រើន ត្រូវ ចាក់អាំងស៊ុយ ១០ ទៅ ២០% នៃកម្រិតប្រើប្រចាំថ្ងៃសរុប ដោយប្រើអាំងស៊ុយលីនមានសកម្មភាពខ្លី ឬលឿន ហើយត្រូវចាត់រៀងរាល់ ២ ទៅ ៤ម៉ោងម្ដង។

ក្នុងករណីកូនយើងមានចេញអាការៈក្អួត នេះជាសញ្ញានៃការធ្លាក់ចុះកម្រិតអាំងស៊ុយលីន និងបញ្ហា Diabetic Ketoacidosis (DKA) ហើយ។ សូមពិគ្រោះជាមួយគ្រូពេទ្យជាបន្ទាន់ឬបញ្ជូនកូនទៅកាន់មន្ទីរពេទ្យភ្លាមៗ។