အမျိုးအစား ၁ ဆီးချိုက ခြေထောက်ကို ဘယ်လိုထိခိုက်စေသလဲ?

သွေးတွင်းအချိုဓာတ်မြင့်မားခြင်းက ကိုယ်ခန္ဓာအစိတ်အပိုင်းတွေကို အကြီးအကျယ်ထိခိုက်ပျက်စီးစေနိုင်ပြီး သွေးလည်ပတ်မှုမကောင်းတာနဲ့ ရောဂါပိုးဝင်တာတွေ ဖြစ်စေနိုင်ပါတယ်။ အဲဒီအခါမှာ ခြေဖဝါး ပူတာ၊ ကျဉ်တာ၊ ဘာခံစားမှူမှမရဘဲထုံ​နေတာမျိုးတွေ ခံစားရနိုင်ပါတယ်။

တကယ်လို့ ထိရောက်တဲ့ကုသမှုမခံယူခဲ့ရင်တော့ ခြေထောက်မှာ ဒဏ်ရာရလာရင် ​ကောင်းကောင်းမကျက်​တာမျိုး၊ ခြေ​ထောက်​တွေကလည်းထုံ​နေတဲ့ မိမိတို့ရဲ့ ခြေထောက်ကအနာတွေကို သတိမထားမိတာမျိုး​တွေဖြစ်လာမှာပါ။ အဲဒီကနေ အနာရင်းပြီး ပိုးဝင်ကာ ခြေထောက်ဖြတ်ရတဲ့အထိ ဖြစ်နိုင်ပါတယ်။

ခြေထောက်‌ရှိရောဂါလက္ခဏာများကို ​​​ဆောလျင်စွာ သိရှိခြင်း

ဆီးချိုရောဂါသည်တွေအနေနဲ့ မိမိတို့ရဲ့ ခြေထောက်(ခြေဖဝါးအပါအဝင်)မှာ အောက်ပါလက္ခဏာတွေ ရှိမရှိ နေ့စဉ်စစ်ဆေးကာဆရာဝန်ထံ အကြောင်းကြားရမယ်။

- ခြေ​ထောက်များထုံခြင်း သို့မဟုတ် အပ်စူးခံရသကဲ့သို့ ကျဉ်ခြင်း

- ခြေ​ထောက်များ ပူခြင်း

- ခြေ​ထောက်များ ကိုက်ခဲခြင်း

- ခြေ​ထောက်များ ပြောင်ချောချောဖြစ်နေခြင်း

- ခြေထောက်ရှိအမွေးများ ကျွတ်ခြင်း

- ‌ခြေထောက်၌ ခံစားမှုတစ်စုံတရာ မရခြင်း

- ခြေ​ထောက်များ ရောင်နေခြင်း

- ခြေ​ထောက်များ၌ ချွေးမထွက်ခြင်

- ခြေထောက်အနာများ မကျက်ခြင်း

- နားနေချိန်/လမ်းလျှောက်ချိန်တို့တွင် ကြွက်တက်ခြင်း

ဒါ့အပြင် ​ခြေ​ထောက်(ခြေဖဝါးအပါအဝင်)မှာ အောက်ဖော်ပြပါ အပြောင်းအလဲတစ်ခုခုကို သတိပြုမိရင်တော့ ဆရာဝန်ထံ ချက်ချင်းဆက်သွယ်သင့်ပါတယ်။

- ခြေ​ထောက်၏ အရောင်အဆင်းနှင့် ပုံပန်းသဏ္ဌာန် ပြောင်းလာခြင်း

- ခြေ​ထောက်များ ပူနေခြင်း၊ အေးနေခြင်း

- ‌ခြေထောက်၌ ရေကြည်ဖု၊ ပွန်းပဲ့ဒဏ်ရာ အစရှိသည်တို့ကို တွေ့မြင်နေရသော်လည်း ခံစားမှုတစ်စုံတရာ မရခြင်း

- ပွင့်နေသော ခြေထောက်အနာမှ အနံ့ဆိုးထွက်ခြင်း

အမျိုးအစား ၁ ဆီးချိုရောဂါရှိသူတွေအနေနဲ့ အာရုံကြောကောင်းမကောင်း သိရှိနိုင်ဖို့ ခြေထောက်ကို တစ်နှစ်လျှင် အနည်းဆုံးတစ်ကြိမ် စစ်ဆေးသင့်ပါတယ်။

ခြေထောက်စစ်ဆေးမှုဆိုတာကတော့ ကျွမ်းကျင်တဲ့ ပညာရှင်ကနေ ခြေထောက်မှာ ထုံတာ၊ သွေးလှည့်ပတ်မှုမ​ကောင်းတဲ့ နေရာ၊ အသားမာတက်နေတဲ့ နေရာ၊ ခြေသည်းကောင်းမကောင်းနဲ့ အခြားသောပြဿနာတွေ ရှိမရှိ စစ်ဆေးပေးတာပဲ ဖြစ်ပါတယ်။ ဒါ့အပြင်သင့်မှာ ခြေထောက်ထိခိုက်နိုင်ချေ ရှိမရှိကိုလည်း ဆွေးနွေးပေးပါလိမ့်မယ်။

ခြေဖဝါးထိခိုက်နိုင်ချေကို လျှော့ချပေးမယ့် နည်းလမ်းများ

- မိမိ၏ သွေးတွင်းအချိုဓာတ်များကို သတ်မှတ်ပမာဏထက် မကျော်စေရန် ဂရုပြုပါ။

- မိမိခြေဖဝါးနှင့် တော်သော သက်​တောင့်သက်သာရှိ​သောဖိနပ်ကိုသာ ရွေးချယ်စီးပါ။ ရှူးဖိနပ်ကြပ်ကြပ်များနဲ့ ​​ဒေါက်ဖိနပ်များမစီးသင့်ပါ။

- ရောဂါပိုးမဝင်စေရန် ခြေထောက်များကို ‌ခြောက်သွေ့သန့်ရှင်းစွာ ထားပါ။

- ခြေသည်းတိုတိုထားပါ။

- ပွန်းပဲ့ဒဏ်ရာများမရစေရန် အပြင်ထွက်လျှင် ခြေဗလာနှင့်သွားခြင်းကို ရှောင်ကြဉ်ပါ။

- တစ်နေ့လျှင် နာရီဝက်ခန့် လေ့ကျင့်ခန်းပြုလုပ်ပါ။