အမျိုးအစား ၁ ဆီးချိုက ကျောက်ကပ်ကို ဘယ်လိုထိခိုက်စေသလဲ?

ရောဂါသက်တမ်းကြာလာတာနဲ့အမျှ ဆီးချိုရောဂါဟာ ကျောက်ကပ်တွေကိုထိခိုက်လာတဲ့အခါ ခန္ဓာကိုယ်က မလိုလားအပ်တဲ့ အရည်နှင့် အဆိပ်အတောက်တွေကို စွန့်ပစ်ဖို့ ပိုမိုခက်ခဲလာပါတယ်။ ဒီလို​ကျောက်ကပ်ထိခိုက်လာခြင်းဟာ သွေးချိုနဲ့ သွေးပေါင်ချိန်တက်ခြင်းတို့ကြောင့်ဖြစ်ပြီး ဆီးချိုကြောင့်ဖြစ်တဲ့ကျောက်ကပ်ရောဂါလို့ လူသိများပါတယ်။

ရောဂါအစောပိုင်းကာလတွေမှာ လက္ခဏာမပြတတ်ဘဲ အချိန်ကြာလာတဲ့အခါမှ ကျောက်ကပ်ပျက်စီးမှုကို ဖြစ်စေနိုင်ပါတယ်။ အဲဒီအခါ ကျောက်ကပ်တွေဟာ ပုံမှန်အလုပ်မလုပ်နိုင်တော့ဘဲ ကျောက်ကပ်ဆေးဖို့ လိုအပ်လာပါတယ်။ တစ်ခါတစ်ရံမှာတော့ ပျက်စီးနေတဲ့ကျောက်ကပ်ဟာ ပြန်လည်ကုသကောင်းမွန်လာနိုင်တဲ့အတွက် ကျောက်ကပ်ရောဂါကို စောနိုင်သမျှစောစောသိရှိဖို့ အရေးကြီးပါတယ်။

ကျောက်ကပ်ရောဂါကို ​ဆောလျင်စွာ သိရှိခြင်း

​ကျောက်ကပ်​ရောဂါဖြစ်လာပြီဆိုရင် ရောဂါအစပိုင်း​တွေမှာ လက္ခဏာ သိသိသာသာမပြတဲ့အတွက် ကျောက်ကပ်ရောဂါအတွက် စမ်းသပ်မှုတွေကို နှစ်စဉ်ပြုလုပ်ဖို့က အရေးကြီးပါတယ်။

ဆီးချိုရောဂါသည်တစ်ယောက်ရဲ့ ကျောက်ကပ်ကျန်းမာရေးကို သိနိုင်ဖို့ ဆီးထဲက အယ်ဗျူမင်လို့ခေါ်တဲ့ အသားဓာတ်နဲ့ သွေးထဲက ခရီတနင်းဓာတ်တွေကို စစ်ဆေးရမှာဖြစ်ပါတယ်။ ဒီအဖြေ ၂ခုကနေ ကျောက်ကပ်ရောဂါကို စောစောတွေ့ရှိနိုင်ပြီး ထိရောက်တဲ့ကုသမှုနဲ့ ပျက်ဆီးမှုတွေကိုလျှော့ချပေးနိုင်ပါတယ်။

ကျောက်ကပ်ရောဂါရင့်လာတာနဲ့အမျှ အမျိုးအစား ၁ ဆီးချိုရောဂါရှိသူတွေမှာ-

- ခြေကျင်းဝတ်နှင့် ခြေလက်များ‌ ရောင်ခြင်း

- ဆီးထဲ သွေးပါခြင်း

- ပင်ပန်းနုံးချိခြင်း

- ​မောခြင်းနဲ့

- နေထိုင်မကောင်းဖြစ်ခြင်း စတဲ့ လက္ခဏာတွေကို ခံစားရနိုင်ပါတယ်။

ဒါ​တွေခံစားလာရတာဟာ ဆီးချိုရောဂါသည်ရဲ့ ကျောက်ကပ်တွေက ခန္ဓာကိုယ်ရဲ့ မလိုလားအပ်တဲ့ အရည်နဲ့ အဆိပ်အတောက်တွေကို ကြိုးစားစွန့်ထုတ်နေရတာကို ပြပါတယ်။ ဒါပေမယ့်လည်း ဒီလက္ခဏာတွေဟာ တခြားအခြေအနေတွေမှာလည်း ဖြစ်တတ်သေးတာမို့ ဆရာဝန်နဲ့ သေချာတိုင်ပင်ဆွေးနွေးဖို့ လိုအပ်ပါတယ်။

ကျောက်ကပ်ထိခိုက်နိုင်ချေကို လျှော့ချပေးမယ့် နည်းလမ်းများ

- မိမိ၏ သွေးတွင်းအချိုဓာတ်များကို သတ်မှတ်ပမာဏထက် မကျော်စေရန် ဂရုပြုပါ။

- သွေးပေါင်ချိန် မတက်အောင် ထိန်းပါ။

- သင့်အတွက် ကျန်းမာရေးနှင့် ညီညွတ်​စေ​သော အစားအစာများကို စားပါ။

- တစ်နေ့လျှင် အနည်းဆုံး နာရီဝက်ခန့် လေ့ကျင့်ခန်းပြုလုပ်ပါ။