1. ការផ្តល់ជំនួយដល់អ្នកជំងឺទឹកនោមផ្អែម៖ ពាក្យរបស់យើងអាចជាប្រភពនៃការលើកទឹកចិត្ត និងការលួងលោម

ផ្នែកមួយដ៏សំខាន់នៃការថែទាំសុខភាពគឺការប្រាស្រ័យទាក់ទងល្អ ជាពិសេសនៅពេលនិយាយដល់ការថែរទាំជំងឺរុំារ៉ៃដូចជាជំងឺទឹកនោមផ្អែមប្រភេទ 1។ គ្រូពេទ្យ និងអ្នកថែទាំមានសារៈសំខាន់ខ្លាំងណាស់នៅក្នុងជីវិតរបស់អ្នកជំងឺទឹកនោមផ្អែមប្រភេទ 1 ព្រោះយើងបានធ្វើការជាច្រើនលើសពីការផ្ដល់ការថែទាំសុខភាព និងផ្តល់ការគាំទ្រផ្នែកស្មារតីដល់អ្នកជំងឺទឹកនោមផ្អែមផងដែរ។ សុខភាពផ្លូវចិត្តរបស់អ្នកជំងឺទឹកនោមផ្អែមប្រភេទ 1 អាចទទួលបានអត្ថប្រយោជន៍យ៉ាងច្រើនពីការកើនឡើងនៃការយល់ដឹងលើភាសាដែលប្រើដោយអ្នកថែទាំ និងគ្រូពេទ្យរបស់ពួកគេ។

អ្នកជំងឺទឹកនោមផ្អែមប្រភេទ 1 អាចមានគុណភាពជីវិតខ្ពស់ជាងនេះ ដោយសារលទ្ធផលផ្ទាល់នៃភាសាដែលយើងប្រើ។ ភាសាអាចលើកទឹកចិត្ត និងជំរុញអ្នកជំងឺទឹកនោមផ្អែមឱ្យធ្វើតាមផែនការព្យាបាល និងសម្រេចបាននូវអ្វីដែលពួកគេបានកំណត់។

2. ចៀសវាងការស្តីបន្ទោស និងមាកងាយ

ជំងឺទឹកនោមផ្អែមប្រភេទ 1 គឺជាជំងឺពិបាកដែលអាចរងឥទ្ធិពលដោយកត្តាជាច្រើន ដែលអាចហួសពីសមត្ថភាពអ្នកជំងឺក្នុងការគ្រប់គ្រងភាពប្រែប្រួលនានា។ គ្រូពេទ្យ និងអ្នកថែទាំមិនត្រូវស្តីបន្ទោស ឬមាកងាយអ្នកជំងឺទឹកនោមផ្អែមប្រភេទ 1 នៅពេលដែលអ្នកជំងឺមានបញ្ហាដូចជា ឡើងជាតិស្ករក្នុងឈាម ឬមានផលវិបាកផ្សេងៗទេ គ្រូពេទ្យ និងអ្នកថែទាំចាំបាច់​ត្រូវ​ផ្តល់​ជំនួយដល់អ្នកជំងឺទឹកនោមផ្អែមប្រភេទ 1 ដូចជា ​ទឹកចិត្ត ការស្រឡាញ់ ការយល់ចិត្ត ការយោគយល់ និង​មិនធ្វើការ​វិនិច្ឆ័យ។

ជាឧទាហរណ៍ គ្រូពេទ្យ និងអ្នកថែទាំអាចនិយាយពាក្យដូចជា «មិនអីទេក្នុងការ​​ធ្វើ​ឲ្យមានកំហុសខ្លះ។ តោះយើងនិយាយអំពីរបៀបជ្រើសរើសរបបអាហារដែលប្រសើរជាងមុន»។ ជំនួសឱ្យ «អ្នកគួរតែបានញ៉ាំអាហារដែលល្អចំពោះសុខភាព»។ ការធ្វើបែបនេះជាវិធីសាស្រ្តល្អដើម្បីផ្តល់ការគាំទ្រដល់អ្នកជំងឺទឹកនោមផ្អែម។ ភាសាដែលធ្វើឱ្យអ្នកជំងឺទឹកនោមផ្អែមមានអារម្មណ៍មិនល្អចំពោះខ្លួនឯង ក៏អាចបន្ថយតម្លៃអ្នកជំងឺ ធ្វើឱ្យសុខភាពផ្លូវចិត្តអ្នកជំងឺកាន់តែធ្ងន់ធ្ងរ និងធ្វើឱ្យអ្នកជំងឺពិបាកក្នុងការរក្សាលំនឹងជាតិស្ករក្នុងឈាម។

ដើម្បីជួយអ្នកជំងឺឱ្យមានអារម្មណ៍ល្អចំពោះខ្លួនឯង គ្រូពេទ្យ និងអ្នកថែទាំត្រូវប្រើភាសាដែលផ្តោតលើមនុស្ស ដែលបំបែកអ្នកជំងឺពីជំងឺទឹកនោមផ្អែមប្រភេទ 1 ដូចជា «អ្នកដែលរស់នៅជាមួយជំងឺទឹកនោមផ្អែមប្រភេទ 1» ឬ «អ្នកកើតជំងឺទឹកនោមផ្អែម»។ ពាក្យ​ដែលគ្រូពេទ្យ និងអ្នកថែទាំ​ប្រើ​អាច​ធ្វើ​ឱ្យ​អ្នក​កើត​ជំងឺ​ទឹក​នោម​ផ្អែម​ប្រភេទ​ 1 មាន​អារម្មណ៍​ធូរស្រាល មាន​កម្លាំង​ចិត្ត​ជា​ជាងចុះ​ចាញ់ និងជួយឱ្យអ្នកជំងឺ​អាច​រស់ជាមួយ​ជំងឺ​ទឹកនោមផ្អែម​ប្រភេទ​ 1​បាន។

3. ការផ្តល់ការគាំទ្រដល់អ្នកជំងឺទឹកនោមផ្អែម៖ ការបង្ហាញការយល់ចិត្ត និងការអាណិតអាសូរ

មធ្យោបាយមួយទៀតក្នុងការផ្តល់ការគាំទ្រដល់អ្នកជំងឺទឹកនោមផ្អែមគឺតាមរយៈការយល់ចិត្ត។ ការយល់ចិត្តគឺជាផ្នែកមួយដ៏សំខាន់បំផុតនៃការសន្ទនាដែលគាំទ្រអ្នកជំងឺទឹកនោមផ្អែម។ គ្រូពេទ្យ និងមើលថែអ្នកជំងឺទឹកនោមផ្អែមប្រភេទ 1 អាចស្វែងយល់បន្ថែមអំពីបញ្ហាផ្លូវចិត្ត និងផ្លូវកាយដែលអ្នកជំងឺទឹកនោមផ្អែមប្រភេទ 1 ជួបប្រទះ និងត្រូវដោះស្រាយជារៀងរាល់ថ្ងៃ។

អ្នកជំងឺទឹកនោមផ្អែមប្រភេទ 1 អាចមានអារម្មណ៍ផ្តាស់ប្តូរខ្លាំងចំពោះគ្រូពេទ្យ និងអ្នកថែទាំ ប្រសិនបើយើងនិយាយពាក្យល្អដែលធ្វើឱ្យអ្នកជំងឺមានអារម្មណ៍ថា អ្នកជំងឺត្រូវបានយកចិត្តទុកដាក់។ ជំនួសឱ្យការនិយាយថា «អ្នកត្រូវគ្រប់គ្រងកម្រិតជាតិស្ករក្នុងឈាម» ដោយ​ការអាចព្យាយាមនិយាយថា «ខ្ញុំដឹងថាការគ្រប់គ្រងជាតិស្ករក្នុងឈាមអាចជាបញ្ហាប្រឈម ប៉ុន្តែខ្ញុំនឹងជួយអ្នកក្នុងការស្វែងរកដំណោះស្រាយ»។ ការផ្លាស់ប្តូរតិចតួចនៅក្នុងនិយាយបង្ហាញថា យើងចង់ជួយ ណែនាំ គាំទ្រ និងប្រឈមបញ្ហាជាមួយអ្នកជំងឺទឹកនោមផ្អែមប្រភេទ 1។

4. ផ្តល់ការណែនាំច្បាស់លាស់ និងវិជ្ជមាន

ការថែរទាំជំងឺទឹកនោមផ្អែមប្រភេទ 1 ទាមទារឱ្យធ្វើកិច្ចការប្រចាំថ្ងៃជាច្រើនដូចជា ពិនិត្យកម្រិតជាតិស្ករក្នុងឈាម ចាក់អាំងស៊ុយលីន និងការជ្រើសរើសរបបអាហារសមស្រប។ គ្រូពេទ និងអ្នកថែទាំគួរតែផ្តល់ការណែនាំច្បាស់លាស់ និងវិជ្ជមានជាជាងធ្វើការវាយតម្លៃ និងសួរសំណួរដែលមិនមានប្រយោជន៍ និងមាកងាយ។

ជំនួសឱ្យការនិយាយថា «អ្នកមិនបានធ្វើការចាក់អាំងស៊ុយលីនបានត្រឹមត្រូវតាមកម្រិតជាតិស្ករក្នុងឈាម» មកនិយាយដោយផ្តល់ការគាំទ្រផ្លូវអារម្មណ៍ដូចជា «តោះយើងពិភាក្សាគ្នាដើម្បីកែសម្រួលការចាក់កម្រិតអាំងស៊ុយលីនដើម្បីគ្រប់គ្រងកម្រិតជាតិស្ករក្នុងឈាមឱ្យមានលំនឹង»។ វិធីសាស្រ្តនេះជំរុញទឹកចិត្តអ្នកជំងឺឱ្យសហការជាមួយគ្រូពេទ្យ និងផ្តល់អំំណាចឱ្យអ្នកជំងឺចូលរួមក្នុងការថែទាំសុខភាពរបស់ពួកគេ។

5. លើកទឹកចិត្តអ្នកជំងឺសួរសំណួរ និងធ្វើការសន្ទនាបើកចំហ

ដើម្បីឱ្យអ្នកជំងឺទឹកនោមផ្អែមប្រភេទ 1 មានអារម្មណ៍សុវត្ថិភាពក្នុងការសួរសំណួរ និងបញ្ចេញនូវកង្វល់របស់ពួកគេ យើងត្រូវបង្កើតកន្លែងសុវត្ថិភាពដើម្បីឱ្យអ្នកជំងឺធ្វើការប្រាស្រ័យទាក់ទង និងផ្តោះប្តូរយោបល់គ្នាតាមរយៈសហគមន៍គាំទ្រអ្នកជំងឺទឹកនោមផ្អែមជាដើម។ នេះ​ជា​មធ្យោបាយ​សំខាន់​មួយ​ទៀត​ក្នុង​ការ​ផ្តល់​ការ​គាំទ្រ​ដល់​អ្នក​កើត​ជំងឺ​ទឹក​នោម​ផ្អែម។ អ្នកថែទាំ និងអ្នកជំនាញផ្នែកថែទាំសុខភាពគួរជំរុញការសន្ទនាផ្តោះប្តូរយោបល់ជាមួយអ្នកជំងឺឱ្យញឹក។

សូម​កុំ​ទាយ​ថា​អ្នក​​ជំងឺ​ទឹក​នោម​ផ្អែម​ប្រភេទ​ 1​ ដឹង ឬ​មាន​អារម្មណ៍​បែប​ណា។ ជំនួសមកវិញ ចូរសួរអ្នកជំងឺថា «តើអ្នកមានសំណួរអ្វីខ្លះអំពីផែនការព្យាបាលរបស់អ្នក?» និង «តើអ្នកមានអារម្មណ៍យ៉ាងណាចំពោះការគ្រប់គ្រងជំងឺទឹកនោមផ្អែមរបស់អ្នក?» វិធីសាស្រ្តនេះបង្កើតអារម្មណ៍ក្នុងការធ្វើការជាក្រុម និងត្រូវប្រាកដថាយើងយល់ជ្រួតជ្រាបពីអារម្មណ៍ សំណួរ និងកង្វល់របស់អ្នកជំងឺទឹកនោមផ្អែមប្រភេទ 1។

ចលនានៃការប្រើប្រាស់ពាក្យពេចន៍បានធ្វើការស្រាវជ្រាវជាច្រើននៅក្នុងសហគមន៍ជំងឺទឹកនោមផ្អែម ដែលបង្ហាញពីសារៈសំខាន់នៃការប្រាស្រ័យទាក់ទងគ្នាតាមរបៀបវិជ្ជមាន និងផ្តល់អំណាច។

6. ការទទួលស្គាល់សមិទ្ធិផល

ជំងឺ​ទឹកនោមផ្អែម​ប្រភេទ​ 1ត្រូវការការព្យាបាលពេញមួយជីវិត និងពោរពេញ​ដោយ​ឧបសគ្គ និង​ភាពជោគជ័យជារៀងរាល់ថ្ងៃ​​​។ ការធ្វើបែបនេះនឹងជំរុញអ្នកជំងឺឱ្យតម្លៃ និងគោរពខ្លួនឯងតាមវិធីមួយដែលស្ថិតស្ថេរ និងគាំទ្រដល់ភាពជោគជ័យរបស់ពួកគេ។ អ្នកថែទាំ និង​ធ្វើ​ការ​ជា​មួយ​នឹង​អ្នក​ដែល​រស់​នៅ​ជាមួយនឹង​ជំ​ងឺ​ទឹក​នោម​ផ្អែម​ប្រភេទ 1 អាច​ត្រូវព្យាយាមទទួលស្គាល់ និងលើកសរសើរលទ្ធផលរបស់អ្នកជំងឺ មិនថាលទ្ធផលនោះធំ ឬតូចទេ។

ជាឧទាហរណ៍ ប្រសិនបើអ្នកជំងឺបានរក្សាលំនឹងជាតិស្ករក្នុងឈាមរបស់ពួកគេក្នុងកម្រិតគោលដៅបានរយៈពេលមួយសប្តាហ៍ សូមប្រាប់ពួកគេថា «ខ្ញុំពិតជាភ្ញាក់ផ្អើរនឹងការលះបង់ និងការប្តេជ្ញាចិត្តរបស់អ្នកក្នុងការខិតខំប្រឹងប្រែងដើម្បីរក្សាលំនឹងកម្រិតជាតិស្ករក្នុងឈាមរបស់អ្នកឱ្យស្ថិតក្នុងកម្រិតគោលដៅ។ ការខិតខំប្រឹងប្រែងរបស់អ្នកបានទទួលការតបស្នងហើយ!» ការស្តាប់ឮរឿងល្អៗបែបនេះអាចធ្វើឲ្យអ្នកជំងឺទឹកនោមផ្អែមមានអារម្មណ៍ធូរស្រាល និងបានការគាំទ្រផ្នែកផ្លូវចិត្ត។ អ្នកជំងឺទឹកនោមផ្អែមប្រភេទ 1 អាចមានអារម្មណ៍ល្អក្នុងការថែរក្សាខ្លួនឯង និងអ្នកនៅជុំវិញខ្លួន។ ទង្វើល្អរបស់យើងអាចនឹងជួយអ្នកជំងឺទឹកនោមផ្អែមឱ្យជួយអ្នកផ្សេងទៀតនៅថ្ងៃអនាគតក៏ថាបាន។

7. #ការប្រើប្រាស់ពាក្យពេចន៍គឺជាសេចក្តីថ្លែងការណ៍រស់

ការសន្ទនាផ្តល់ការគាំទ្រដោយប្រើភាសាសមរម្យគឺជាឧបករណ៍ដ៏មានប្រយោជន៍ក្នុងការទំនាក់ទំនងជាមួយអ្នកជំងឺទឹកនោមផ្អែមប្រភេទ 1។

ភាសាដែលយល់ចិត្ត មិនរើសអើង មានទិសដៅច្បាស់លាស់ ការសន្ទនាបើកចំហ ទស្សនវិស័យវិជ្ជមាន និងការទទួលស្គាល់អាចធ្វើឲ្យអ្នកជំងឺទឹកនោមផ្អែមប្រភេទ 1មានសុខុមាលភាពទាំងផ្នែកផ្លូវកាយ និងផ្លូវចិត្ត។ តាមរយៈការជ្រើសរើសពាក្យនិយាយដោយឆ្លាតវៃ និងផ្តល់ការគាំទ្រឥតឈប់ឈរនេះអាចជួយអ្នកជំងឺទឹកនោមផ្អែមប្រភេទ 1 ប្រឈមមុខនឹងជំងឺរុំារ៉ៃនេះដោយភាពជឿជាក់ អត់ធ្មត់ និងអាចបង្កើនគុណភាពជីវិតរបស់ពួកគេ។

ភាសានិយាយមានសារៈសំខាន់សម្រាប់អ្នកជំងឺទឹកនោមផ្អែមណាស់។ ដើម្បីរស់នៅឱ្យបានល្អជាមួយនឹងជំងឺនេះ គ្រូពេទ្យ អ្នកថែទាំជំងឺ និងអ្នកជំងឺត្រូវសហការគ្នា។