ផ្តល់ការស្រលាញ់ និង ផ្គត់ផ្គង់ដល់សមាជិកគ្រួសារដែលមានជំងឺទឹកនោមផ្អែមប្រភេទ១ (T1D) អាចមានឥទ្ធិពលលើទំនាក់ទំនង ក្នុងរង្វង់គ្រួសារ មិត្តភ័ក្តិ ឬដៃគូស្នេហា។

ការគ្រប់គ្រង T1D ជាមួយគ្រួសារ មិត្តភ័ក្តិ និងដៃគូស្នេហា អាចជួយឱ្យយើងមិនសូវមានអារម្មណ៍ឯកោ។  ភាពជិតស្និទ្ធ និងទំនាក់ទំនងដែលមានស្រាប់ កាន់តែល្អប្រសើរ។

ការប្រាស្រ័យទាក់ទងគ្នាជាប្រចាំ និងបើកចំហ មិនថាក្នុងទំនាក់ទំនងណាមួយ សំខាន់ដើម្បី គាំទ្រលើកទឹកចិត្តគ្នាទៅវិញទៅមក។

ការយល់ដឹងពីផលប៉ះពាល់ដែល T1D អាចមានលើទំនាក់ទំនងរបស់យើង ព្រមទាំងបញ្ហាទូទៅដែលអាចកើតមានឡើង នឹងជួយឱ្យយើងអាចគ្រប់គ្រងគ្រាលំបាកៗក្នុងទំនាក់ទំនងរបស់យើងបានប្រសើរជាងមុន។

១. ទំនាក់ទំនងគ្រួសារ និងជំងឺទឹកនោមផ្អែមប្រភេទ១

បងប្អូនអន់ចិត្ត ច្រណែន

• នៅពេលមានកូនណាម្នាក់កើតជំងឺទឹកនោមផ្អែមប្រភេទ១ (T1D) នោះច្បាស់ណាស់ថា យើងជាអាណាព្យាបាលនឹង យកចិត្តទុកដាក់លើអ្នកឈឺ ច្រើនលើសពីសមាជិកផ្សេងទៀត ដោយសារត្រូវជូនគេទៅមន្ទីរពេទ្យផង មើលថែទាំគេផង។ ដូច្នេះ កូនដទៃទៀត អាចមានអារម្មណ៍អន់ចិត្ត​ ថាយើងមិនរវីរវល់ ហើយមិនសប្បាយចិត្តដោយសារតែរឿងនេះ។

• កូនអាចមានអារម្មណ៍ថាយើងតឹងតែង នៅពេលកំណត់អ្វីត្រូវញ៉ាំ និងអ្វីៗផ្សេងទៀតគេត្រូវធ្វើ ដើម្បីគ្រប់គ្រង T1D ឱ្យបានល្អ។ សូមរំលឹកកូនឲ្យដឹងថា ទាំងអស់នេះគឺព្រោះតែក្តីស្រឡាញ់ ហើយចង់ឱ្យកូនមានសុខភាពល្អ និងសប្បាយរីករាយ។

• គួរឲ្យកូនៗឯទៀត ចូលរួម និង​ចែករំលែកលើការគ្រប់គ្រង T1D ដើម្បីកុំឲ្យពួកគេចេះតែមានអារម្មណ៍ថាយើងលំអៀង

• សូមណែនាំវិបសាយ និងហ្វេសប៊ុកផេក HelloType1 ឱ្យពួកគេយល់ពី T1D កាន់តែច្រើន និងដឹងថា ដែលកូនឈឺ កំពុងឆ្លងកាត់ និងជួបប្រទះផលពិបាកអ្វីខ្លះ។

ឪពុកម្តាយបែកបាក់គ្នា

• ការរស់នៅមិនចុះសម្រុងគ្នា ហើយឈានដល់ការបែកបាក់គ្រួសារគឺជាសោកនាដកម្មមួយ

• ទោះជាយ៉ាងណាក៏ដោយបើមានកូនកើតទឹកនោមផ្អែមប្រភេទ១ នោះអ្នកទាំងពីរ ត្រូវតែបន្តថែទាំកូនឲ្យបានល្អប្រសើរ មិនថាកូននៅផ្ទះខាងណាក៏ដោយ។

• ទោះបីជាលំបាកបន្តិចមែន តែត្រូវទាក់ទងផ្តល់យោបល់ និងព័ត៌មានឲ្យគ្នា ពីការថែទាំកូន ហើយបើយើងមានដៃគូផ្សេងទៀត យើងក៏ត្រូវឲ្យគេដឹងហើយចូលរួមថែទាំកូនយើងទាំងអស់គ្នា

ឪពុក ឬម្តាយដែលមើលកូនតែម្នាក់ឯង

• ការមើលថែទាំកូនតែម្នាក់ឯងពិតជាលំបាកណាស់ ព្រោះបន្ទុក និងទំនួលខុសត្រូវទាំងអស់ធ្លាក់មកលើអ្នកតែម្នាក់ឯង

• នឿយហត់ពេកអ្នកអាចសុំជំនួយពីមនុស្សជុំវិញខ្លួន អាចជាសាច់ញាតិ ឬជាកូនៗតែម្តង

• ត្រូវមានមនុស្សជាទីពឹង​ក្នុងករណីចាំបាច់ពេលមានអាសន្ន ពេលត្រូវការឲ្យគេជួយមើលកូន ឬ គ្រាន់តែអង្គុយស្តាប់យើងនិយាយរឿងក្នុងចិត្តក៏បាន

• ឲ្យកូនធំ ជួយមើលកូនប្អូនដែលឈឺ តែកុំបណ្តោយទាំងស្រុងអី

គ្រួសារធំ

• ពេលកូនណាម្នាក់របស់យើងត្រូវបានធ្វើរោគវិនិច្ឆ័យឃើញថាមាន T1D លោកតាលោកយាយ មីងពូ បងប្អូនសាច់ញាតិ ជាទូទៅមិនសប្បាយចិត្ត និងព្រួយបារម្ភផងដែរ។

• សមាជិកគ្រួសារធំមួយចំនួនអាចមានការយល់ច្រឡំ មិនដឹងថា T1D ជាអ្វី និងមានន័យយ៉ាងណា ជាពិសេសបើពួកគេមកពីជំនាន់ខុសគ្នា មានអាយុខុសគ្នា ឬវប្បធម៌ផ្សេងគ្នា។

• សូមណែនាំវិបសាយ និងហ្វេសប៊ុកផេក HelloType1 ដើម្បីឱ្យពួកគេបានអាន ស្ដាប់ ដឹងពីអ្វីជា T1D និងថាតើវាមានន័យយ៉ាងណាសម្រាប់យើង។

• ចួនកាល យើងអាចហត់ក្នុងពន្យល់ឱ្យគ្រប់គ្នាយល់ យើងអាចប្រើ HelloType1 ជាជំនួយឲ្យគ្រប់គ្នាស្វែងយល់។

២. ទំនាក់ទំនងផ្សេងទៀត និងជំងឺទឹកនោមផ្អែមប្រភេទ១

ទំនាក់ទំនងស្នេហា

• មានបញ្ហាសុខភាព ដូចជាជំងឺទឹកនោមផ្អែមប្រភេទ១ មិនមានន័យថាកូនៗមិនអាចមានទំនាក់ទំនងស្នេហានោះទេ។

• ត្រូវលើកទឹកចិត្តកូនឲ្យស្មោះត្រង់ជាមួយដៃគូខ្លួនអំពីស្ថានភាពសុខភាព។ ប្រតិកម្មរបស់ដៃគូអាចប្រាប់កូនៗ ថាតើគេពិតជាសាកសម សម្រាប់ឲ្យកូនបន្តទៅមុខជាមួយដែរឬទេ។

• ដៃគូរបស់កូនគួរតែជាមនុស្សចិត្តទូលាយ បើកចំហស្វែងយល់ពី T1D ហើយពេញចិត្តចូលរួមគ្រប់គ្រង T1D។ ណែនាំវិបសាយ និងហ្វេសប៊ុសផេក HelloType1 ដើម្បីឱ្យគេយល់ និង ចូលរួមសហការគ្រប់គ្រង T1D ជាមួយកូន ។

• ឱ្យដៃគូទៅពេទ្យជាមួយកូនៗដើម្បីស្វែងយល់បន្ថែម

• ទោះបីជារស់នៅជាមួយជំងឺទឹកនោមផ្អែមប្រភេទ១  កូនៗ​អាច​រៀប​ការ និង​បង្កើត​គ្រួសារ​ដូច​អ្នក​ដទៃ​ដែរ។

មិត្តភ័ក្តិ

• មាន T1D មិនមែនមានន័យថា កូនរបស់យើងមិនអាចមានមិត្តភ័ក្តិ មិនអាចចូលរួមក្នុងព្រឹត្តិការណ៍សង្គម និងសកម្មភាព  សប្បាយៗបាននោះទេ។

• ត្រូវប្រាប់កូនឲ្យមានភាពស្មោះត្រង់ជាមួយមិត្តភ័ក្តិ ហើយប្រតិកម្មរបស់ពួកគេពេលដឹងថាកូនមាន T1D នឹងបញ្ជាក់ថាតើពួកគេនឹងក្លាយជាមិត្តល្អរបស់កូនដែរឬទេ។

• លើកទឹកចិត្តឲ្យមិត្ដជិតស្និទ្ធរបស់កូនយល់ពី T1D និងការគ្រប់គ្រង ដើម្បីអាចជួយ និងមើលថែគ្នាទៅវិញទៅមក

• ណែនាំវិបសាយ និងហ្វេសប៊ុកផេក HelloType1 ដើម្បីឱ្យពួកគេស្វែងយល់ និងចួលរួមគ្រប់គ្រង T1D

ទោះបីជាកូនយើងមានជំងឺទឹកនោមផ្អែមប្រភេទ១ ក៏ដោយ ក៏ពួកគេនៅតែអាចមានទំនាក់ទំនងល្អ សុភមង្គល និងស្នេហាជាមួយគ្រួសារ មិត្តភ័ក្តិ និងដៃគូជីវិតដូចអ្នកដទៃដែរ។

សូមសុំជំនួយ និងទទួលយកការគាំទ្រពីមនុស្សជាទីស្រឡាញ់ និងក្រុមគ្រូពេទ្យ។ វាអាចកាត់បន្ថយភាពតានតឹង និងចែករំលែកកង្វល់ក្នុងចិត្ត បាន។ សូមចាំថា គ្រប់គ្នានៅក្បែរអ្នកជានិច្ច!