သွေးတွင်းအချိုဓာတ်ဆိုတာ ဘာလဲ?

သွေးတွင်းအချိုဓာတ်ဆိုတာ သွေးထဲမှာရှိတဲ့ ဂလူးကို့စ်(သကြား) ပမာဏဖြစ်ပါတယ်။ ဂလူးကို့စ်ကို အစားအသောက်ကနေရရှိသလို အသည်းနှင့်ကြွက်သားတွေမှာမှာသိုလှောင်ထားတဲ့ ဂလူးကို့စ်တွေကိုလည်း ခန္ဓာကိုယ်က ထုတ်လွှတ်ပေးပါသေးတယ်။ ဂလူးကို့စ်ဟာ ခန္ဓာကိုယ်တစ်ခုလုံးက ဆဲလ်​တွေအလုပ်လုပ်ဖို့ အဓိကစွမ်းအင်ရင်းမြစ်ဖြစ်ပြီး​တော့ ဂလူးကို့စ်ဓါတ် ဆဲလ်တိုင်းကို​ရောက်ဖို့ ​သွေးကသယ်​ဆောင်​ပေးပါတယ်။

သွေးတွင်းအချိုဓာတ် စစ်ဆေးတယ်ဆိုတာ ဘာလဲ?

သွေးတွင်းအချိုဓာတ်​နေ့စဥ်စစ်ဆေးတယ်ဆိုတာ ဆီးချိုရောဂါထိန်းချုပ်ခြင်းနဲ့ နောက်ဆက်တွဲပြဿနာတွေကို ကာကွယ်ရာမှာ အရေးပါလှတဲ့စစ်ဆေးမှုဖြစ်ပါတယ်။ မိမိရဲ့​သွေးတစ်စက်ထဲမှာသွေးတွင်းအချိုဓာတ်ပမာဏကို ဂလူကိုမီတာ (glucometer) လို့ခေါ်တဲ့ ကိရိယာထဲကို လက်ချောင်းကသွေးအနည်းငယ်ထည့်လိုက်ရုံနဲ့ စက်မျက်နှာပြင်မှာ​ဖော်ပြတဲ့အ​ဖြေကိုဖတ်ခြင်းအားဖြင့် မိမိတို့အိမ်/ကျောင်းမှာတင် စမ်းသပ်စစ်ဆေးနိုင်ပါတယ်။

"အမျိုးအစား ၁ ဆီးချိုရောဂါရှိသူတွေအတွက်တော့ သွေးတွင်းအချိုဓာတ်စစ်ဆေးတာဟာ နေ့စဉ်လိုအပ်တဲ့ အင်ဆူလင်ပမာဏ၊ စားသုံးနေတဲ့အစားအစာနဲ့ မိမိရဲ့နေထိုင်မှုဘဝပုံစံတွေကို ဟန်ချက်ညီအောင် ဘယ်လိုထိန်းညှိနေသလဲဆိုတာကိုသိရှိနိုင်တဲ့ အကောင်းဆုံးနည်းပဲ ဖြစ်ပါတယ်။

"

သွေးတွင်းအချိုဓာတ်စစ်ဆေးဖို့ ဘာကြောင့်အရေးကြီးတာလဲ?

- မိမိထိုးလိုက်တဲ့ အင်ဆူလင် အလုပ်လုပ်/မလုပ် စောင့်ကြည့်စစ်ဆေးဖို့

- မိမိရဲ့ သွေးချို တက်နေလား/ကျနေလား သိဖို့

- အစားအသောက်နဲ့ လေ့ကျင့်ခန်းတို့ရဲ့ သွေးတွင်းအချိုဓာတ်အပေါ်သက်ရောက်ပုံတွေကို နားလည်ဖို့

- နေထိုင်မကောင်းဖြစ်တဲ့အခါ ဒါမှမဟုတ် စိတ်ဖိစီးမှုများတဲ့အခါ သွေးတွင်းအချိုဓာတ်အပေါ်သက်ရောက်မှုရှိတယ်ဆိုတာ နားလည်ဖို့ပဲ ဖြစ်ပါတယ်။

သွေးတွင်းအချိုဓာတ်တွေကို ကောင်းကောင်းမထိန်းချုပ်နိုင်တဲ့အခါ ​ရေတိုပြသနာဖြစ်တဲ့ ​သွေးတွင်းအချိုဓါတ်ကျဆင်းခြင်း (ဟိုက်ပို)အပြင် ​သွေးတွင်းအချိုဓါတ်လွန်ကဲစွာတက်ခြင်း​ကြောင့် ဆီးချိုဆိပ်တက်ခြင်းနဲ့ ဆီးချိုရောဂါကြောင့် သတိလစ်မေ့မြောခြင်းတို့အထိဖြစ်ပွားနိုင်ပြီး အသက်အန္တရာယ်ကိုပါ ခြိမ်းခြောက်နိုင်ပါတယ်။

ဆီးချို​ရောဂါကို​ကောင်း​ကောင်းကုသထိန်းချုပ်မှုမပြုလုပ်ရင် ရေရှည်မှာ နှလုံး၊ ကျောက်ကပ်၊ မျက်လုံးနဲ့ အာရုံကြောတို့လို ခန္ဓာကိုယ်ရဲ့အရေးပါတဲ့အင်္ဂါတွေကို ထိခိုက်စေနိုင်ပြီး ရုတ်တရက်နှလုံးထိခိုက်ခြင်း၊ လေဖြတ်ခြင်း၊ ကျောက်ကပ်ပျက်ခြင်း၊ မျက်စိကွယ်ခြင်းနဲ့ အာရုံကြော‌ပြဿနာများကို ဖြစ်ပေါ်စေနိုင်ပါတယ်။

နေထိုင်မကောင်းဖြစ်ခြင်းက ခန္ဓာကိုယ်ရဲ့ လိုအပ်တဲ့ အင်ဆူလင်ပမာဏအပေါ် သက်ရောက်မှုရှိနိုင်ပါတယ်။ မိမိရဲ့ သွေးချိုပမာဏကို မှန်မှန်စစ်ဆေးခြင်းက ဆီးချိုကုထုံးကို ပြောင်းဖို့ လိုမလို (ဥပမာ - အင်ဆူလင် အတိုးအ‌လျှော့ လုပ်ဖို့ လို မလို) ကို ဆရာဝန်ကဆုံးဖြတ်တဲ့​နေရာမှာ အကူအညီ​ပေးနိုင်ပါလိမ့်မယ်။

အသက်ကြီးလာတာနဲ့အမျှ မိမိရောဂါအတွက် အုပ်ထိန်းသူမိဘတွေကို အားမကိုးဘဲ ဆရာဝန်ရဲ့လမ်းညွှန်ချက်နဲ့အညီ မိမိကိုယ်တိုင် လိုက်နာလုပ်ဆောင်နိုင်​အောင်​လေ့လာသင်ယူဖို့က အ​ရေးကြီးပါတယ်။