Bakit mahalagang magkaroon ng meal plan?

Hindi kinakailangang maging istrikto sa kinakain, ngunit kailangan mong magbigay pansin sa kung ano at gaano karami ang iyong kakainin. Bakit? Dahil tutulungan ka nitong mapanatiling nasa tamang level ang glucose mo sa dugo. Nakatutulong ang meal plan para sa mga may diabetes upang matukoy ang tamang pagkain at manatiling malusog ang katawan.

Kailangan mong balansihin ang kinokonsumo mong carbohydrate sa insulin na tinatanggap ng katawan mo at sa mga aktibidad na ginagawa mo upang mapanatiling kontrolado ang glucose level sa iyong dugo. Makatutulong ito upang maiwasan ang pangmatagalang problema sa kalusugan na may kinalaman sa diabetes.

Kailangan mong malaman kung ano ang nasa pagkaing inihahanda mo. Mahalagang malaman mo ang pagkaing may carbohydrates at matukoy kung mabuti o masamang klase ng carbs.

Ang good carbs ay matatagpuan sa mga wholefood ingredients tulad ng mga gulay (hal. carrot o talong). Ang mga bad carbs naman ay makikita sa mga processed food tulad ng panghimagas at meryenda (hal. cake, matatamis na tinapay, tsokolate, at kendi) o matatamis na inumin. Maging maingat din sa mga pagkain at inuming nabibili sa kalsada na maaaring may sweet milk o may sobrang dagdag na asukal.

Hangga’t maaari, tumingin sa mga label ng pagkain upang makita ang mga sangkap nito, nutritional information at calorie content tuwing bibili sa palengke.

Kung nais mong bumili ng pagkain na nakahanda na sa mga naglalako, huwag mahiyang tanungin sila kung ano ang sangkap ng pagkain at kung may dagdag itong asukal.

Ang plate method

Sa bawat paghahanda ng pagkain, subukan itong balansehin sa pamamagitan ng paglalagay ng tamang dami ng carbs at iba pang sustansya upang makontrol ang diabetes at mas maging masarap ang pagkain.

Maaari mong sundan ang plate method. Simple at madaling sundan ito:

- ½ pinggan: madahon at non-starchy vegetables: hal. repolyo, broccoli, carrot, pipino o morning glory

- ¼ na pinggan: carbohydrate (grains at starchy vegetables) hal. whole grain rice/tinapay, mais, patatas o gabi

- ¼ na pinggan: protina: halimbawa, walang taba sa karne, isda o itlog

- optional: isang baso ng gatas (low fat) o sariwang prutas

Mahalagang magkaroon ng maayos na paghahanda ng pagkain at ma-enjoy ito, ngunit kailangan mo munang matutuhan kung paano ito gagawin at paano ito makaaapekto sa iyo. Mahalagang makapili ng tamang pagkain tulad ng mabuting kaibigan na makatutulong sa iyong lumaking malusog.

Ano ang mga tip upang maging masustansya ang pagkain ng may type 1 Diabetes?

- Huwag magpapalipas ng pagkain at subukang kumain sa parehong oras araw-araw

- Kumain ng pare-parehong dami ng carbohydrates araw-araw

- uminom ng maraming tubig

- pumili ng mas masustansyang carbohydrates tulad ng brown rice sa halip na puting kanin o malagkit na bigas.

- Dagdagan ang kinakaing gulay at prutas

- Pumili ng mas masustansyang pagkain (prutas) kung gusto mong magmeryenda

- Mag-ehersisyo ng 30 minuto kada araw

Subukang iwasan/bawasan ang:

- Matatamis na inumin, meryenda o panghimagas – Okay lang na magkaroon ng special treats sa ilang okasyon tulad ng selebrasyon ng kaarawan at iba pa ngunit sa kontroladong dami lamang.

- Processed food (delatang karne, sausage)

- Bawasan ang dami ng asukal sa pagkain

Pag-inom ng alak:

Ang alak ay may carbohydrates at makaaapekto ito sa level ng glucose sa iyong dugo. Ang pagkonsumo ng tamang dami ng alak ay maaaring magpataas ng glucose sa dugo ngunit ang sobrang pag-inom ay magiging sanhi ng hypoglycemia.

Puwede kang uminom kung may okasyon ngunit sa tamang dami lang at tiyaking nakakakain ka sa parehong oras. Regular na bantayan ang blood sugar at uminom ng maraming tubig sa susunod na araw. Alamin ang mga panganib ng pagkakaroon ng hypoglycemia at gamutin agad ito kung mayroon kang mga sintomas.

Huwag matakot sa carbohydrates

Isa sa mahalagang bagay na dapat tandaan ay hindi kailangang lubos na iwasan ang carbohydrates. Bagaman ang layunin ng pagkontrol sa diabetes ay manatiling nababantayan ang blood sugar, kailangan pa rin ng katawan mo ng carbohydrates na pinagmumulan ng enerhiya upang gumana ang katawan nang mabuti.

Kung nag-aalala kang sumobra sa pagkonsumo ng carbohydrates, ang maaari mong gawin ay tingnan ang dami ng carbs na kinakain mo sa buong araw. Sa ganitong paraan, magkakaroon ka ng ideya kung kailangan mo pa ng dagdag na carbs o kailangang bawasan.

Key Takeaways

Ang kinakain natin ay may direktang epekto sa level ng asukal sa ating dugo. Totoo ito lalo na sa mg ana-diagnose na may type 1 Diabetes.

Ang mga simpleng bagay tulad ng paghahanda ng meal plan at pagiging alerto sa iyong kinakain sa araw-araw ay may malaking epekto sa pagkontrol mo ng diabetes. Sa pamamagitan ng pagtitiyak na tama ng iyong kinakain at tama rin ang dami, makokontrol mo ang iyong blood sugar at maiiwasan ang mga epekto ng diabetes.