၁။ ကျောင်းမှာ ဆီးချိုရောဂါစီမံထိန်းညှိဖို့အတွက် ဘေးကင်းလုံခြုံတဲ့ပတ်ဝန်းကျင်

ကလေးတွေက သူတို့ရဲ့အချိန်အများစုကို ကျောင်းမှာ ကုန်ဆုံးပြီး ကျောင်းသားတွေ၊ အထူးသဖြင့် အမျိုးအစား ၁ ဆီးချိုရောဂါရှိသူတွေရဲ့ဘဝမှာ ဆရာတွေက အရေးပါတဲ့ကဏ္ဍက ပါဝင်နေပါတယ်။

အမျိုးအစား ၁ ဆီးချိုရောဂါရှိတဲ့ကလေးတွေအတွက် ဘေးကင်းလုံခြုံပြီး အားလုံးပါဝင်ခွင့်ရှိတဲ့ ပတ်ဝန်းကျင်တစ်ခု ဖန်တီးရာမှာ အထောက်အပံ့ကောင်းပေးနိုင်ဖို့အတွက် ဆရာတွေအနေနဲ့ အမျိုးအစား ၁ ဆီးချိုရောဂါအကြောင်း လေ့လာဖို့လိုပါလိမ့်မယ်။

ဆရာတွေအနေနဲ့ အမျိုးအစား ၁ ဆီးချိုရောဂါအကြောင်းကို နားလည်သိရှိခြင်းက အမျိုးအစား ၁ ဆီးချိုရောဂါရှိတဲ့ကလေးတွေကို ဘေးကင်းပြီး အားလုံးပါဝင်ခွင့်ရတဲ့ခံစားချက်ကို ပေးနိုင်မယ့် ကျောင်းပတ်ဝန်းကျင်တစ်ခု ဖန်တီးနိုင်စေဖို့ အထောက်အကူပေးပါတယ်။

အရေးကြီးဆုံးတစ်ခုကတော့ မိဘတွေ၊ အမျိုးအစား ၁ ဆီးချိုရောဂါရှိတဲ့ကလေးတွေနဲ့ ဆရာတွေကြားမှာ ထိရောက်တဲ့ ပြောဆိုဆက်သွယ်ရေး ရှိဖို့ပါပဲ။

ဒီနေရာမှာ ဆက်သွယ်ရေးနဲ့ပတ်သက်တဲ့ အကြံပြုချက်တချို့ကို တင်ပြမှာဖြစ်ပါတယ်။ ရည်ရွယ်ချက်ကတော့ ကျောင်းသားတိုင်း ဘေးကင်းလုံခြုံပြီး အရှိအတိုင်းနေနိုင်ကာ ပျော်ရွှင်နိုင်စေဖို့ ဖြစ်ပါတယ်။

၂။ ဆရာတွေနဲ့ ထိရောက်တဲ့ ဆက်သွယ်မှုရှိခြင်းက ကျောင်းမှာ ဆီးချိုထိန်းညှိရေးအတွက် အထောက်အကူဖြစ်စေပါတယ်

သင့်ကလေးက အမျိုးအစား ၁ ဆီးချိုရောဂါရှိတယ်ဆိုရင် ကျောင်းမှာ ဆီးချိုစီမံထိန်းညှိခြင်းအကြောင်းကို ကလေးရဲ့ဆရာတွေနဲ့ ပြောဆိုဖို့ အရေးကြီးပါတယ်။ ဒါမှ သင့်ကလေးက ဘေးကင်းလုံခြုံပြီး ကျန်းမာနေမှာပါ။

ပထမအဆင့်က သင့်ကလေးရဲ့ အမျိုးအစား ၁ ဆီးချိုရောဂါအကြောင်း ဆရာတွေကို ပြောပြဖို့ပါ။ ဒါမှ သင့်ကလေးရဲ့ အမျိုးအစား ၁ ဆီးချိုရောဂါ လိုအပ်ချက်တွေနဲ့ အရေးပေါ်အခြေအနေတွေကို ကိုင်တွယ်ဖြေရှင်းရာမှာ သူတို့ ကူညီပေးနိုင်မှာဖြစ်ပါတယ်။

မိဘတွေအနေနဲ့ သွေးတွင်းသကြားဓာတ်ကို ဘယ်လိုစောင့်ကြည့်ရမယ်၊ အင်ဆူလင် ဘယ်လိုစီမံပေးရမယ်ဆိုတာ ဆရာတွေကို ပြသပေးထားနိုင်ပါတယ်။

ဒီလိုသိထားရင် တစ်ခုခုပြဿနာဖြစ်လာတဲ့အခါ ကလေးတွေကို အချိုပါတဲ့မုန့်တွေပေးတာ ဒါမှမဟုတ် အကူအညီခေါ်ပေးတာလိုမျိုး ဆရာတွေက မြန်မြန်ဆန်ဆန် ကူညီပေးလို့ရနိုင်ပါတယ်။

HelloType 1 ဝက်ဘ်ဆိုက်မှာပြထားသလိုမျိုး ရုပ်ပုံဖော်ပြချက်တွေကို အသုံးပြုခြင်းအားဖြင့် သင့်ကလေးရဲ့ရောဂါကို ဆရာတွေက ပိုနားလည်ပြီး ကျောင်းမှာ ဆီးချိုရောဂါထိန်းညှိရေးကို ကူညီနိုင်ပါလိမ့်မယ်။

သင့်ကလေးအတွက် တခြားမရှိမဖြစ်လိုအပ်တဲ့ ထည့်သွင်းစဉ်းစားစရာတွေထဲမှာ စာသင်ခန်းအတွင်း သူ့ကို (မုန့်စားဆင်းချိန်မရောက်ခင် ဖြစ်ရင်တောင်မှ လိုအပ်တဲ့အချိန်တိုင်း) အဆာပြေမုန့်စားခွင့်ပေးဖို့၊ ပုံမှန်သွေးတွင်းသကြားဓာတ်စစ်ဆေးမှုအတွက် အပြင်ထွက်ခွင့်ပေးခြင်းနဲ့ ကိုယ်လက်လှုပ်ရှားမှုတချို့ကို ပြင်ဆင်မွမ်းမံပေးဖို့ ပါဝင်ပါတယ်။

အမျိုးအစား ၁ ဆီးချိုရောဂါရှိသူတစ်ယောက်ဆီက ပြောစကား - "ပြင်ဆင်မွမ်းမံပေးတာတွေက စာလေ့လာမှုမှာ အာရုံစိုက်နိုင်အောင် အထောက်အကူဖြစ်စေပါတယ်။ အထူးသဖြင့် စာသင်ခန်းထဲမှာ ဆီးချိုကျလာပြီလို့ခံစားရရင် အစားစားတာမျိုး (ကိုယ်ကအရင်တောင်းဆိုရမှာ) ကိုယ်တိုင်လုပ်လို့ အဆင်ပြေပါတယ်။

ဆီးချိုတက်လွန်း၊ ကျလွန်းတာကို မထိန်းနိုင်တာဟာ အရေးပေါ်အခြေအနေတွေဖြစ်လာစေနိုင်တာကြောင့် ဒီလိုအပြောင်းအလဲတွေ ထားရှိဖို့ အရေးကြီးပါတယ်။ သင်ယူလေ့လာမှုကနေ ရလဒ်ကောင်းတွေ ရနိုင်ဖို့ ထိန်းညှိမှုက အရေးကြီးပါတယ်။"

အပြီးသတ်ပြောရရင် သင့်ကလေးရဲ့ အမျိုးအစား ၁ ဆီးချိုရောဂါအကြောင်း ဆရာကို ပြောပြခြင်းက တခြားကျောင်းသားတွေကိုပါ ဒီရောဂါအကြောင်း အသိပညာပေးရင်းနဲ့ အားလုံးပါဝင်ခွင့်ရပြီး မျှတမှုရှိတဲ့ ပတ်ဝန်းကျင်တစ်ခုကို မြှင့်တင်ပေးဖို့ အားပေးရာရောက်ပါတယ်။

ဒီလိုနဲ့ ဘယ်ကလေးမှ အပြစ်မြင်မခံရဘဲ ကျောင်းမှာ ပါဝင်ခွင့်ရဖို့နဲ့ ကောင်းကောင်းစွမ်းဆောင်နိုင်ဖို့ကို အားလုံးတန်းတူအခွင့်အရေးရစေမယ့် ကြင်နာမှု၊ နားလည်မှုတွေပြည့်ဝတဲ့ ပတ်ဝန်းကျင်တစ်ခုကို ဖန်တီးနိုင်မှာပါ။

"""တစ်စုံတစ်ယောက်မှာ အမျိုးအစား ၁ ဆီးချိုရောဂါရှိနေတာနဲ့ပဲ ကျွန်တော်တို့တွေ တူညီတဲ့အရာတွေကို မလုပ်နိုင်တော့တာမဟုတ်ပါဘူး။ ကျွန်တော်တို့တွေ လုပ်နိုင်ပါတယ်။ သွေးတွင်းသကြားဓာတ်ကို ထိထိရောက်ရောက် ထိန်းညှိနိုင်ဖို့ နောက်ထပ်စဉ်းစားရမယ့် အချက်တွေရှိပါသေးတယ်။ ဒါပေမယ့် လူတိုင်း သာတူညီမျှ ဆက်ဆံခံရဖို့ သိပ်အရေးကြီးပါတယ်။"" လို့ အမျိုးအစား ၁ ဆီးချိုရောဂါရှိသူတစ်ဦးက ပြောပါတယ်။"

၃။ ကျောင်းမှာ ဆီးချိုရောဂါ စီမံထိန်းညှိခြင်းနဲ့ပတ်သက်လို့ ပွင့်လင်းစွာ ပြောဆိုပြီး ဆက်သွယ်ပါ

သင့်ကလေးမှာ အမျိုးအစား ၁ ဆီးချိုရောဂါရှိကြောင်း သိသိချင်း ဆရာများကို သင့်ကလေးဟာ ကျောင်းမှာ အဆာပြေမုန့် ဒါမှမဟုတ် ရေ တို့လို အထူးထားရှိပေးရမယ့်အရာတွေ လိုအပ်ခြင်းရှိမရှိ ဒါမှမဟုတ် သွေးတွင်းသကြားဓာတ်ကို ပုံမှန်စစ်ဆေးဖို့ လိုမလို အသိပေးထားခြင်းက အတော်လေး အထောက်အကူဖြစ်စေပါတယ်။

သင့်ကလေးရဲ့ အမျိုးအစား ၁ ဆီးချိုရောဂါစီမံထိန်းညှိမှု ပုံမှန်လုပ်ဆောင်စရာတွေကိစ္စတွေကို တွေ့ဆုံဆွေးနွေးဖို့ စီစဉ်တာက ကလေးကို သင်ယူမှုမှာ အာရုံစိုက်နိုင်အောင် ကူညီရာရောက်ပြီး ကျောင်းမှာ ဆီးချိုထိန်းညှိဖို့ကို သိပ်စိတ်မပူရတော့ပါဘူး။

ဆရာတွေ နားလည်လွယ်နိုင်မယ့် အမျိုးအစား ၁ ဆီးချိုရောဂါ အသိပညာပေးကိရိယာများ ပေးထားမယ်ဆိုရင် အမျိုးအစား ၁ ဆီးချိုရောဂါကို ပိုပြီးမြန်မြန် လေ့လာနိုင်မှာပါ။ ဆရာ မရှိတဲ့အခါမျိုးမှာ ကျောင်းအုပ် လိုမျိုး ဒုတိယ တာဝန်ရှိတဲ့ပုဂ္ဂိုလ်ကို ဆီးချိုရောဂါအရေးပေါ်အခြေအနေတွေကို ဖြေရှင်းရာမှာ ကူညီဖို့ တာဝန်ပေးထားနိုင်ပါတယ်။

အမျိုးအစား ၁ ဆီးချိုရောဂါရှိသူတစ်ယောက်ရဲ့အမြင်မှာတော့ "အမျိုးအစား ၁ ဆီးချိုရောဂါကို လူသိပ်မသိတဲ့အတွက် ကျွန်တော့မိဘတွေက ဆရာတွေနဲ့ သူနာပြုတွေကို ကျွန်တော့ရောဂါအကြောင်း ပြောပြလိုက်တာ အထောက်အကူဖြစ်ခဲ့ပါတယ်။ ဥပမာ ဆီးချိုကျတဲ့ အခြေအနေတွေအကြောင်း မျှဝေတာမျိုးပါ - ဆရာတွေက ဘယ်လိုသတိထားကြည့်ရမယ်ဆိုတာနဲ့ ဘယ်လိုကုသပေးရမလဲ ဆိုတာမျိုးပေါ့။"

စာသင်နှစ်တလျှောက် ဆရာနဲ့အဆက်အသွယ်မပြတ်ရှိနေတာက သင့်ကလေးကို ကျောင်းစာမှာ ထိပ်ဆုံး ရှိနေစေဖို့ အထောက်အကူဖြစ်စေနိုင်ပါတယ်။ ဆီးချိုရောဂါကို သေချာထိန်းညှိနိုင်တာက ကျောင်းမှာ ကောင်းစွာစွမ်းဆောင်နိုင်ပြီး သင်ယူလေ့လာမှုပိုကောင်းစေမယ့် သော့ချက်ဖြစ်ပါတယ်။

သူတို့ကို သင်ကထောက်ပံ့ပေးနေမှာဖြစ်ပြီး သင့်ကလေးရဲ့ ဆီးချိုထိန်းညှိမှုနဲ့ပတ်သက်တဲ့ အချက်အလက်သစ်တိုင်းကို အသိပေးမယ်ဆိုတာ ဆရာတွေသိအောင်ပြောပြပါ။

အဲဒါက အင်ဆူလင်ပမာဏ ဒါမှမဟုတ် အစားအသောက်အစီအစဉ်တွေ ပြောင်းလဲတာ ဖြစ်နိုင်သလို သင့်ရဲ့အရေးပေါ်ဆက်သွယ်ရမယ့် အချက်အလက်ကို ပြင်ဆင်တာမျိုးလည်း ဖြစ်နိုင်ပါတယ်။

၄။ သင့်ကလေးကို စွမ်းရည်မြှင့်တင်ပေးဖို့ အတူလုပ်ဆောင်ခြင်း

ကျောင်းမှာ သင့်ကလေးဟာ သတ်မှတ်ထားတဲ့အချိန်တစ်ခု (ဥပမာ နေ့လယ်စာ မစားခင် ၁၅ မိနစ်အလို) မှာ အင်ဆူလင်ထိုးဖို့ လိုအပ်ကြောင်း ဆရာသိအောင်ပြောဖို့ အရေးကြီးပါတယ်။

ဒီထဲမှာ သွေးတွင်းသကြားဓာတ် ပုံမှန်စစ်ဆေးရတာနဲ့ သကြားဓာတ် အမြန်တက်စေမယ့် အချိုမုန့်တွေလိုမျိုး စားစရာတွေကို လက်လှမ်းမီအောင်ထားရှိပေးဖို့ ပါဝင်ပါတယ်။

ဖြစ်နိုင်ရင် ဆီးချိုတိုင်းစက်နဲ့ သွေးတွင်းသကြားဓာတ် ဘယ်လိုစစ်ဆေးရမယ်ဆိုတာ ဆရာကို ပြထားပါ။ ဒါက ဆရာအနေနဲ့ အရာရာကို သိရှိနားလည်ဖို့ ပိုလွယ်ကူစေပါလိမ့်မယ်။

ကလေးက ငယ်သေးတယ်ဆိုရင်တောင် အမျိုးအစား ၁ ဆီးချိုရောဂါကို ကိုင်တွယ်ဖြေရှင်းရာမှာ သင့်ကလေးကို ကူညီပေးဖို့ ဆရာကို တောင်းဆိုနိုင်ပါတယ်။ အဲဒါက သူတို့ကို ပိုပြီးအမှီအခိုကင်းလာအောင်နဲ့ သူတို့ရဲ့ ကိုယ့်ကိုယ်ကို စောင့်ရှောက်နိုင်စွမ်းကို တိုးတက်စေပါလိမ့်မယ်။

"""တချို့ဆရာတွေအနေနဲ့ အတွေ့အကြုံကိုအခြေခံပြီး အမျိုးအစား ၁ ဆီးချိုရောဂါကို စိုးရိမ်ပူပန်နိုင်တာ ပုံမှန်ပါပဲ။ ဒါပေမယ့် ကျွန်တော် ကောင်းကောင်းလုပ်နိုင်တယ်လို့ ဆရာတွေကို ပြောပြတာက အထောက်အကူဖြစ်ပါတယ်။ ကျွန်တော်တို့အနေနဲ့ အရေးပေါ်အခြေအနေတစ်ခုမှာ ဘေးကအကူအညီလေးပဲ လိုတာဖြစ်နိုင်ပါတယ်။ ဒါပေမယ့် ကျွန်တော်တို့တွေက ကာယအတန်းချိန်တွေနဲ့ တခြားလှုပ်ရှားမှုတွေမှာ တခြားကျောင်းသားတွေလိုပဲ ပါဝင်နိုင်ပါသေးတယ်။"

ကျွန်တော် အားကစားလေ့ကျင့်တဲ့အချိန်တိုင်း လှုပ်ရှားမှုကြောင့် ဆီးချိုကျမသွားအောင်လို့ နားချိန်တွေမှာ သွေးတွင်းသကြားဓာတ်ကို စစ်ဆေးပြီး ကာဗိုဟိုက်ဒရိတ်တွေကို စားဖို့လိုလာနိုင်ကြောင်းကို မစခင်တည်းက နည်းပြကို ပြောထားတယ်။" လို့ အမျိုးအစား ၁ ဆီးချိုရောဂါရှိသူတစ်ဦးက ပြောပါတယ်။

၅။ ကျန်းမာရေးပညာရှင်တစ်ဦးရဲ့ အမြင်

အမျိုးအစား ၁ ဆီးချိုရောဂါရှိသူတစ်ဦးအတွက် ပြုစုစောင့်ရှောက်သူအဖြစ်နဲ့နေရတာ အရမ်းပင်ပန်းနိုင်သလို စိတ်ကျေနပ်စရာလည်းကောင်းနိုင်ပါတယ်။

ကျောင်းမှာ အမျိုးအစား ၁ ဆီးချိုရောဂါကို စီမံထိန်းညှိရတဲ့အခါ ထိရောက်တဲ့ ပြောဆိုဆက်သွယ်ရေးရဲ့ အရေးပါပုံကို ဆရာဝန်တစ်ယောက်အနေနဲ့ ကျွန်တော်နားလည်ပါတယ်။

အမျိုးအစား ၁ ဆီးချိုရောဂါရှိတဲ့ ကလေးတွေရဲ့ မိဘ သို့မဟုတ် အုပ်ထိန်းသူတွေအနေနဲ့ ကလေးတွေ ကျောင်းမှာရှိနေတဲ့အခါ ဘေးကင်းပြီး သက်သောင့်သက်သာရှိစေဖို့အတွက် ဆရာတွေနဲ့ အဆက်သွယ်မပြတ်ခြင်းက သိပ်အရေးကြီးပါတယ်။ ဂရုစိုက်ပေးဖို့လိုတဲ့အချိန် အသင့်ရှိနေမယ့်ဆရာတွေရှိနေတာက ကျောင်းမှာ ဆီးချိုရောဂါထိန်းညှိဖို့အတွက် တကယ်ကို အထောက်အကူဖြစ်စေနိုင်ပါတယ်။

ကလေးရဲ့ အမျိုးအစား ၁ ဆီးချိုရောဂါအကြောင်းကို ကျောင်းမှာပြောပြထားပြီး ဆရာတွေနဲ့ အဆက်အသွယ်ရှိတဲ့ မိဘတွေဟာ သူတို့ရဲ့ ကလေးကို မျှမျှတတ ဆက်ဆံခံရဖို့နဲ့ ကောင်းကောင်းမွန်မွန် ပညာသင်ကြားနိုင်စေဖို့ ကြိုးစားတာလည်း ဖြစ်ပါတယ်။

၆။ ကျေးဇူးတင်တတ်ပြီး ပွင့်လင်းပါ

အမျိုးအစား ၁ ဆီးချိုရောဂါရှိနေတာနဲ့ပဲ သင့်ကလေးက တခြားသူတွေလို မလုပ်နိုင်တော့မှာ မဟုတ်ပါဘူး။ ကလေးတွေကို သင်ယူကြီးပြင်းလာနိုင်အောင် ကူညီပေးခဲ့တာတွေအားလုံးအတွက် သင့်ကလေးရဲ့ ဆရာတွေကို ကျေးဇူးတင်ဖို့ မမေ့ပါနဲ့။

ကျောင်းမှာ သူငယ်ချင်းတွေနဲ့ ကောင်းကောင်းနေနေရင်းနဲ့ သင့်ကလေးက အမျိုးအစား ၁ ဆီးချိုရောဂါရဲ့ စိန်ခေါ်မှုတွေကို ဖြေရှင်းနိုင်အောင် ကူညီပေးခဲ့တာတွေအတွက် သူတို့ကို ကျေးဇူးတင်လိုက်ပါ။

ဆက်ဆံရေးအဆင်ပြေပြီး အချင်းချင်းကူညီတတ်တဲ့ ပြုစုစောင့်ရှောက်သူတွေနဲ့ ဆရာတွေရှိတာက သင့်ကလေးရဲ့ အထွေထွေကျန်းမာရေးနဲ့ အောင်မြင်မှုမှာ ကြီးမားတဲ့ကွာခြားမှု ရှိစေနိုင်ပါတယ်။

အမျိုးအစား ၁ ဆီးချိုရောဂါရှိတဲ့ကလေးတွေရဲ့ မိဘတွေအနေနဲ့ ဆရာတွေနဲ့ ပွင့်လင်းတဲ့ဆက်ဆံရေးရှိဖို့၊ သူတို့လိုအပ်တဲ့ အချက်အလက်တွေအားလုံးပေးဖို့၊ အတူလုပ်ဆောင်ဖို့၊ အဆက်အသွယ်မပြတ်ဖို့နဲ့ သူတို့လိုအပ်တဲ့ ကိရိယာတွေ ပေးဖို့လုပ်ရင်းနဲ့ ခိုင်မာတဲ့ ဆက်ဆံရေးကို တည်ဆောက်နိုင်ပါတယ်။