၁။ သင့်ရဲ့စိတ်ပိုင်းဖြတ်မှုက အမျိုးအစား ၁ဆီးချိုရောဂါကို အလုပ်မှာ ကူညီပေးနိုင်ပါတယ်။

အလုပ်ခွင်မှာ အမျိုးအစား ၁ဆီးချိုရောဂါကို စီမံထိန်းညှိဖို့ ကြိုးစားတဲ့အခါ သင့်ကို ကူညီပေးနိုင်မှာက သင့်ရဲ့ စိတ်ပိုင်းဖြတ်မှုပါပဲ။

အလုပ်မှာ အားစိုက်ကြိုးပမ်းမှုနဲ့ တက်ကြွမှုရှိဖို့ လိုအပ်ပြီးသားဆိုပေမယ့် အမျိုးအစား ၁ ဆီးချိုရောဂါနဲ့ပတ်သက်ပြီး ဂရုစိုက်ဖို့လည်း လိုပါတယ်။

ဒါ့ကြောင့် သင်သွားမယ့်လမ်းကြောင်းက စိန်ခေါ်မှုတွေ၊ အခွင့်အလမ်းတွေနဲ့ ပြည့်နှက်နေမှာပါ။ ဒီလမ်းတလျှောက်မှာ ကူညီပေးမှာက သင့်ကိုထောက်ပံ့အားပေးနိုင်တဲ့ အဖွဲ့သားတွေရဲ့ ကွန်ရက်ဖြစ်ပါတယ်။

ဒီဆောင်းပါးမှာ သင့်ကို ပရော်ဖက်ရှင်နယ်ဆန်ဆန် ဘယ်လိုနေမလဲဆိုတာ လမ်းညွှန်ပေးဖို့ နဲ့ အမျိုးအစား ၁ဆီးချိုရောဂါနဲ့ အလုပ်ကို နှစ်ခုစလုံး ဘယ်လိုတာဝန်ယူမလဲဆိုတာ အဖြေရှာပေးဖို့ ရည်ရွယ်ပါတယ်။ သင့်အဖွဲ့သားတွေအနေနဲ့ ဒီလိုစိန်ခေါ်မှုများတဲ့ကာလတလျှောက် သင့်ကိုနားလည်ပေးဖို့နဲ့ ကူညီပေးဖို့က ဘယ်လောက်အရေးကြီးလဲဆိုတာ အဓိကထား ဖော်ပြသွားမှာပါ။

အလုပ်မှာ အောင်မြင်နိုင်ဖို့နဲ့ ဒီစိန်ခေါ်မှုတွေကို ကျော်လွှားနိုင်ဖို့ သင်လိုအပ်မယ့် အချက်တွေကို ဆက်ပြီးဖတ်ကြည့်လိုက်ပါ။

၂။ အဖွဲ့သားတွေရဲ့ အရေးပါပုံ

သင့်အဖွဲ့သားတွေက သင့်ရဲ့အမျိုးအစား ၁ ဆီးချိုရောဂါအကြောင်း၊ ဒီရောဂါနဲ့ပတ်သက်လို့ လိုအပ်မယ့်အရာတွေနဲ့ ဖြစ်လာနိုင်တဲ့ အန္တရာယ်တွေအကြောင်းကို သိထားမယ်ဆိုရင် ကွာခြားမှုအတော်ကြီးမားစေနိုင်ပါတယ်။ အလုပ်ခွင်မှာ ဆီးချိုရောဂါကို စီမံထိန်းညှိနိုင်ဖို့ သင် မှီခိုအားထားလို့ရမယ့် သူတွေ အနားမှာ ရှိနေတာက တကယ်ကို အကူအညီဖြစ်စေပါတယ်။

သွေးတွင်းသကြားဓာတ်ကျဆင်းခြင်းအတွက် အရေးပေါ်ပစ္စည်းတွေ (အချိုရည်၊ သကြားလုံးလိုမျိုး) နဲ့ သွေးတွင်းသကြားဓာတ်မြင့်တက်ခြင်းအတွက်အရေးပေါ်ပစ္စည်းတွေ (အင်ဆူလင်လိုမျိုး)တို့လို အရေးပေါ်ပစ္စည်းကိရိယာတွေ ထားရှိတဲ့နေရာကို အဖွဲ့သားတွေကို ပြထားပြီး သွေးတွင်းသကြားဓာတ်ပမာဏ စစ်ဆေးနည်းကို သင်ပေးထားတာတွေက အလုပ်ခွင်ကို ပိုပြီးဘေးကင်းစေနိုင်ပါတယ်။

ဆီးချိုအတက်အကျလက္ခဏာတွေလိုမျိုး သင့်ရောဂါအခြေအနေတွေကို ဘယ်လိုတုံ့ပြန်ရမလဲဆိုတာ သူတို့တွေ နားလည်ထားတယ်ဆိုရင် အရေးပေါ်အခြေအနေတွေအတွက် အသင့်ပြင်ဆင်ပြီးသား ဖြစ်စေပါတယ်။

ပထမအဆင့်အနေနဲ့ အချိုရည်တွေ၊ သွေးတွင်းသကြားဓာတ်စစ်ဆေးမှုပစ္စည်းတွေနဲ့ တခြားအထောက်အပံ့ပစ္စည်းတွေပါတဲ့ ဆီးချိုအရေးပေါ်ဆေးအိတ်ကို ယူလာတာက သင်လိုအပ်တဲ့အခါ အဖွဲ့သားတွေက ကူညီပေးလို့ရနိုင်မှာပါ။

သင့်မှာဖြစ်တတ်တဲ့ သူတို့မသိထားတဲ့အကြောင်းအရာတွေနဲ့ သတင်းအချက်အလက်တွေကိုလည်း ပိုပြီးပြောပြပေးထားနိုင်ပါတယ်။

၃။ ကြိုတင်ပြင်ဆင်ခြင်း၊ ထောက်ပံ့အားပေးတဲ့ဝန်းကျင်အတွက် တံခါးဖွင့်ပေးခြင်း

တကယ်တော့ အလုပ်လုပ်နေတဲ့အချိန်အတွင်း ယာယီပြဿနာတွေ ရှိလာနိုင်တာမို့ ကြိုဆင်ပြင်ဆင်ထားဖို့ အရေးကြီးပါတယ်။

မမျှော်လင့်ဘဲ သွေးတွင်းသကြားဓာတ် ကျဆင်းတဲ့အချိန်တွေအတွက် စားပွဲပေါ် ဒါမှမဟုတ် အများပိုင်ဧရိယာတစ်ခုမှာ သကြားလုံးတွေ ဒါမှမဟုတ် အချိုရည်တွေ ထားရှိပါ။

အလုပ်ခွင်မှာ အမျိုးအစား ၁ဆီးချိုရောဂါကို စီမံထိန်းညှိဖို့အတွက် မမေ့သင့်တဲ့အချက်တစ်ခုက အချိန်ကြာတဲ့ အစည်းအဝေးတွေ တက်ရဖို့ရှိတယ်ဆိုရင် အဆာပြေမုန့်တစ်ခု ယူသွားဖို့လိုမလိုသိရဖို့ သင့်ရဲ့ သွေးတွင်းသကြားဓာတ်ကို စစ်ဆေးကြည့်ရပါမယ်။ ဒါမှမဟုတ် သင့်ရဲ့ ကျန်းမာရေးအဖွဲ့က အကြံပြုတဲ့အတိုင်း အင်ဆူလင်ကို ယူသွားပါ။

သင့်သကြားလုံးတွေ ဘယ်မှာထားတယ်၊ အရေးပေါ်အခြေအနေတွေမှာ ဘာလုပ်ရမယ်ဆိုတာနဲ့ အချိန်ကြာတဲ့ အစည်းအဝေးတွေမှာ ဘာစားဖို့လိုမလဲ ဆိုတာတွေအားလုံးကို သင့်ရဲ့အဖွဲ့သားတွေ သိအောင်လုပ်ထားပါ။

သင့်ရဲ့ယုံကြည်ရတဲ့ အဖွဲ့သားတွေက သင့်ကိုကူညီဖို့ ရှိနေမှာပါ။ ဘယ်အချိန်မှာ သွေးတွင်းသကြားဓာတ်ပမာဏကို ထပ်စစ်ဆေးဖို့ သင့်ကိုပြောရမလဲ ဒါမှမဟုတ် အဆာပြေမုန့် လိုမလို သင့်ကိုမေးရမလဲဆိုတာမျိုး လုပ်ဆောင်ရမှာတွေကို သူတို့သိပါလိမ့်မယ်။

၄။ သင့်အခွင့်အရေးတွေကို မေ့မထားပါနဲ့

အလုပ်ခွင်မှာ သင့်အခွင့်အရေးတွေနဲ့ သင်တောင်းဆိုနိုင်တဲ့အရာတွေကို မေ့မထားပါနဲ့။ အားမနာပါနဲ့။

အမျိုးအစား ၁ ဆီးချိုရောဂါရှိသူတစ်ယောက်အနေနဲ့ သင်ဟာ နေ့စဉ်လိုအပ်လောက်တဲ့အရာတွေ ရှိနိုင်ပါတယ်။

အဲဒါတွေကတော့ သင့်စားသောက်ပုံဆိုင်ရာ လိုအပ်ချက်တွေ၊ သန့်စင်ခန်းသွားခွင့် ဒါမှမဟုတ် အင်ဆူလင် စီမံမှုတွေ ပါဝင်ပါလိမ့်မယ်။

သင့်အလုပ်ခွင်မှာ ကင်န်တင်းက အစားအသောက် ပံ့ပိုးပေးတယ်ဆိုရင် သင်ရှောင်ရမယ့်အစားအသောက်တွေ ရှိနိုင်တာမို့ အလုပ်မှာ ဆီးချိုကိုထိန်းညှိနိုင်ဖို့က စားသောက်ပုံဟာ သင့်အတွက်အရေးကြီးကြောင်း သင့်ကုမ္ပဏီကို အသိပေးထားနိုင်ပါတယ်။

အမျိုးအစား ၁ ဆီးချိုရောဂါရှိသူတွေအတွက် သန့်စင်ခန်းသွားခွင့်တွေကလည်း အရေးကြီးပါတယ်။ ဒီအကြောင်းကို သင့်အဖွဲ့သားတွေ ဒါမှမဟုတ် သူဌေးကို ပြောပြထားတာကလည်း သင့်လိုအပ်ချက်တွေကို သူတို့နားလည်စေဖို့ အထောက်အကူဖြစ်စေပါတယ်။

နောက်ဆုံးအချက်အနေနဲ့ အလုပ်မှာ အင်ဆူလင်ထိုးတာက ဘာပြဿနာမှမရှိပါဘူး။ တခြားသူတွေက သင့်ကို အနိုင်ကျင့်တာ ဒါမှမဟုတ် အရှက်ရစေတာ ရှိလာရင် အထက်အရာရှိ ဒါမှမဟုတ် HR ဝန်ထမ်းကို ပြောပြပါ။ လက်တွေ့မှာ သိပ်မလွယ်ကူနိုင်ပေမယ့် သူတို့ကို အသိပညာပေးတာ ဒါမှမဟုတ် အမျိုးအစား ၁ ဆီးချိုရောဂါနဲ့ဆိုင်တာတွေကို မျှဝေပေးတာမျိုးက နောက်ပိုင်းအတွက် ပိုကောင်းပါတယ်။

အလုပ်ခွင်မှာ ပွင့်လင်းတဲ့ ပြောဆိုဆက်သွယ်မှုရှိမယ်ဆိုရင် အမျိုးအစား ၁ ဆီးချိုရောဂါကို စီမံရာမှာ အင်ဆူလင်ထိုးခြင်းက ဘယ်လိုအရေးကြီးကြောင်းကို သင့်အဖွဲ့သားတွေက သိရှိနားလည်လာပါလိမ့်မယ်။

ဒါ့ကြောင့် ပွင့်လင်းတဲ့ ပြောဆိုဆက်သွယ်မှုရှိဖို့၊ လက်ဦးမှုရယူဖို့နဲ့ သင့်လျော်တဲ့ တောင်းဆိုမှုတွေ လုပ်ထားဖို့ သိပ်အရေးကြီးပါတယ်။

၅။ သင့်အောင်မြင်မှုအတွက် ကူညီအားပေးမယ့်သူတွေရှိပါတယ်

မှန်ကန်တဲ့ အလုပ်ပတ်ဝန်းကျင်က သင့်ကို ကျန်းမာအောင်မြင်စေပြီး အလုပ်မှာ အမျိုးအစား ၁ဆီးချိုရောဂါကို စီမံနိုင်ဖို့ ကူညီပေးမှာပါ။

လုပ်ဖော်ကိုင်ဖက်တွေကြောင့် သင့်ကိုယ်သင် တန်ဖိုးရှိကြောင်းနဲ့ ကြံ့ခိုင်မှုကိုခံစားရစေတဲ့အခါ ဘယ်နည်းနဲ့မဆို သင့်ကိုတိုးတက်အောင်မြင်စေပါလိမ့်မယ်။

သင့်ကိုနားလည်ပြီး အားပေးမယ့် အဖွဲ့သားတွေရှိရင် သင်ဟာ ကိုယ့်ကိုယ်ကိုယုံကြည်မှုနဲ့ အလုပ်မှာ အောင်မြင်မှုကို ပိုခံစားရနိုင်ပါတယ်။

လူတိုင်းဟာ အလုပ်ခွင်ကို နေရာကောင်းတစ်ခုဖြစ်လာအောင် ကိုယ့်ကဏ္ဍကနေ လုပ်ဆောင်ဖို့ လိုတယ်ဆိုတာ မမေ့ပါနဲ့။

သင့်အကြောင်းကို မျှဝေပေးတာ၊ သင့်ရောဂါအကြောင်း အသုံးဝင်မယ့်အချက်အလက်တွေကို အဖွဲ့သားတွေဆီ ပေးတာနဲ့ အမျိုးအစား ၁ ဆီးချိုရောဂါနဲ့နေထိုင်ရာမှာ သင်ဘယ်လောက်ကြံ့ခိုင်သန်မာကြောင်း ပြသတာတွေလုပ်ဆောင်ပြီး ပိုဂရုစိုက်ပေးတတ်တဲ့ အလုပ်ခွင်ဖြစ်အောင် လုပ်ဆောင်နိုင်ပါတယ်။

အမျိုးအစား ၁ ဆီးချိုရောဂါနဲ့ရင်ဆိုင်နေရချိန်မှာ သင့်ရဲ့ပန်းတိုင်တွေကို ရောက်ရှိနိုင်အောင် ကူညီပေးမယ့်သူတွေအဖြစ် သူတို့ကို ခွင့်ပြုလိုက်ပါ။ ခက်ခဲကောင်းခက်ခဲနိုင်ပေမယ့် ဒါဟာ ကျွန်တော်တို့တွေ အများကြီးသင်ယူလိုက်နိုင်တဲ့ ဘဝအတွေ့အကြုံတစ်ခုပါပဲ။