ကိုယ်လက်လှုပ်ရှားဖို့ ဘာလို့အရေးကြီးတာလဲ?

ကိုယ်လက်လှုပ်ရှားခြင်းက ခန္ဓာကိုယ်ကို ခွန်အား​ပေးပြီး ကျန်းမာတဲ့ကိုယ်အ​လေးချိန်မှာလည်းထိန်းထား​ပေးနိုင်လို့ လူတိုင်းအတွက် အရေးကြီးပါတယ်။ အထူးသဖြင့် အမျိုးအစား ၁ ဆီးချိုရောဂါသည်တွေအတွက်တော့ ကိုယ်လက်လှုပ်ရှားခြင်းဟာ သွေးချိုဓာတ်ကို ပိုမိုထိန်းပေးနိုင်ပြီး မိမိကိုယ်ကို ယုံကြည်မှုကိုပါ မြှင့်တင်ပေးတာကြောင့် ပိုလို့အရေးကြီးပါတယ်။

လမ်းလျှောက်ခြင်း၊ စက်ဘီးစီးခြင်းကနေ ဘောလုံးကန်ခြင်းအထိ လေ့ကျင့်ခန်းအားလုံးက အကျိုးရှိပါတယ်။ ဒါကြောင့် ဆီးချိုရောဂါရှိသူတွေအနေနဲ့ တစ်နေ့ကို နည်းနည်းစီ ကိုယ်လက်လှုပ်ရှားမှု ပြုလုပ်သင့်ပါတယ်။ စစချင်းအနေနဲ့ တစ်နေ့ကို မိနစ် ၃၀ လေ့ကျင့်ခန်းလုပ်ဖို့ ရည်မှန်းပါ။ ပြီးရင်တော့ တစ်ပတ်ကို ၅ ရက်ကနေ ၆ ရက် မိနစ် ၆၀ အထိ လေ့ကျင့်ခန်းလုပ်ချိန်ကို တဖြည်းဖြည်း တိုးပေးနိုင်ပါတယ်။

လေ့ကျင့်ခန်းလုပ်ခြင်းက သွေးတွင်းအချိုဓာတ်အပေါ် ဘယ်လိုသက်ရောက်မှုရှိသလဲ?

လေ့ကျင့်ခန်းလုပ်ခြင်းနဲ့ ကိုယ်လက်လှုပ်ရှားမှုတို့က သွေးတွင်းအချိုဓာတ်အပေါ် အမျိုးမျိုးသက်ရောက်မှု ရှိနိုင်ပါတယ်–

များသောအားဖြင့်တော့ သွေးတွင်းအချိုဓာတ်ကို ကျဆင်းစေပါတယ်–

- ကြွက်သားတွေက ဂလူးကို့စ်ကို စွမ်းအင်အဖြစ် ပိုမိုအသုံးပြုလာလို့နဲ့

-ကိုယ်ခန္ဓာက အင်ဆူလင်ကို ပိုမိုတုံ့ပြန်လာလို့ ဖြစ်ပါတယ်။

တစ်ခါတရံမှာတော့ လေ့ကျင့်ခန်းလုပ်ခြင်းက သွေးတွင်းအချိုဓာတ်ကို မြင့်တက်စေပါတယ်–

- ကိုယ်ခန္ဓာအပေါ် အခြားဟော်မုန်းတွေရဲ့အကျိုးသက်ရောက်မှု (အများအားဖြင့် စိတ်ဖိစီးမှု သို့မဟုတ် စိတ်လှုပ်ရှားမှုတို့ကြောင့် ခေတ္တယာယီသွေးချိုတက်ခြင်း) နဲ့

- နေထိုင်မကောင်းဖြစ်ခြင်း တို့ကြောင့် ဖြစ်ပါတယ်။

အမျိုးအစား ၁ ဆီးချိုရောဂါရှိသူအတွက် လေ့ကျင့်ခန်းဆိုင်ရာ အကြံပြုချက်များ

- လေ့ကျင့်ခန်းမလုပ်ခင် သွေးအချိုဓာတ်ကို စစ်ဆေးခြင်းက လေ့ကျင့်ခန်းမစခင်မှာ အစားအစာ ဘယ်လောက်စားသင့်တယ်ဆိုတာ ဆုံးဖြတ်ဖို့ အထောက်အကူပြုပါတယ်။

- မိမိလေ့ကျင့်ခန်းလုပ်တဲ့အခါ သွေးချိုကျလာရင် လိုအပ်မယ့်အရာ (ဥပမာ - ဖျော်ရည်၊ သစ်သီး) တို့ကို အဆင်သင့်‌ဆောင်ထားပါ။

- နည်းပြ ဒါမှမဟုတ် ကြီးကြပ်သူကို ကြိုတင်အသိပေးထားပါ။ မိမိဆီးချိုတက်လာရင်ပဲဖြစ်ဖြစ် ကျလာရင်ပဲဖြစ်ဖြစ် ကူညီပေးနိုင်တဲ့သူရဲ့ ကြီးကြပ်မှုအောက်မှာသာ နေပါ။

- အင်ဆူလင်ဆေးထိုးခြင်း– အင်ဆူလင်ထိုးပြီးရင် သွေးချိုမြန်မြန်ကျတတ်လို့ ဆေးထိုးပြီး ၂ နာရီအတွင်း ဆီးချိုရောဂါသည်တွေအနေနဲ့ လေ့ကျင့်ခန်းမလုပ်သင့်ပါ။ အင်ဆူလင်ကို ဘယ်အချိန် ထိုးရမလဲဆိုတာ မသေချာရင် ဆရာဝန်နဲ့ တိုင်ပင်ဆွေးနွေးပါ။

- လေ့ကျင့်ခန်းမလုပ်မီ စားသင့်တဲ့အစားအစာ– ဆီးချိုရောဂါရှိသူကလေးတစ်ဦး လေ့ကျင့်ခန်းမလုပ်မီ အစာ ဘယ်လောက်စားရမလဲဆိုတာကို ဆရာဝန်/သူနာပြုထံမေးပါ။ များသောအားဖြင့် သစ်သီး၊ အဆီနည်းတဲ့နို့၊ ဒိန်ချဉ်၊ ဘီစကွတ် ဒါမှမဟုတ် ပေါင်မုန့်တစ်ချပ် စတဲ့အစားအစာတွေကို ကျွေးလို့ရပါတယ်။

လေ့ကျင့်ခန်းအချိန်ကြာကြာ လုပ်ရမယ်ဆိုရင်တော့ ကစီဓာတ်ကို ပိုစားဖို့ ဒါမှမဟုတ် အင်ဆူလင်ဆေးကို လျှော့ချဖို့ ဒါမှမဟုတ် ၂ခုလုံး လိုအပ်နိုင်ပါတယ်။ ဒါကြောင့် ဆရာဝန်/သူနာပြုနဲ့ ဆွေးနွေးသင့်ပါတယ်။

မိမိကျန်းမာရေးကို ဂရုစိုက်ပါ။

မိမိရဲ့ ကျန်းမာရေးကို ကိုယ်တိုင်ဂရုစိုက်ဖို့ကလည်း အရေးကြီးပါတယ်။ ဒါကြောင့် ကျောင်းတွင်းကာယချိန်မှာ လေ့ကျင့်ခန်းလုပ်နေရင်း အဆင်မပြေဖြစ်လာရင် ဆရာမကို ချက်ချင်းပြောပါ။

အားကစား ဒါမှမဟုတ် လေ့ကျင့်ခန်း လုပ်နေတာကို ခဏရပ်ဖို့ လိုလာရင် ရပ်လိုက်ပါ။ မိမိအနေနဲ့ သွေးချိုပြန်တက်လာအောင် အစာစားတာမျိုး၊ သွေးအချိုဓာတ်စစ်ဆေးတာမျိုးတွေ လိုအပ်လာရင် လုပ်ရမှာပါ။