ការរស់នៅ​ជាមួយនឹងជំងឺទឹកនោមផ្អែមប្រភេទ 1 អាចមានឥទ្ធិពលលើទំនាក់ទំនងរបស់អ្នកជាមួយគ្រួសារ មិត្តភក្តិ ឬដៃគូស្នេហា។

ការគ្រប់គ្រងជំងឺទឹកនោមផ្អែមប្រភេទ 1 ជាលក្ខខណៈក្រុមគ្រួសារ មិត្តភ័ក្តិ និងដៃគូស្នេហា អាចជួយឱ្យអ្នកមិនសូវមានអារម្មណ៍ឯកោ។ មិនត្រឹមតែប៉ុណ្ណោះ អ្នកនឹងកាន់តែជិតស្និទ្ធ ព្រមទាំងជួយពង្រឹងចំណងទាក់ទងដែលមានស្រាប់ទៀតផង។

ការជជែកគ្នាជាទៀងទាត់ និងបើកចំហនៅក្នុងទំនាក់ទំនងណាមួយ មានសារៈសំខាន់ណាស់ ធ្វើដូច្នេះ ទើបអ្នកអាចគាំទ្រគ្នាទៅវិញទៅមក។

ការយល់ដឹងពីផលប៉ះពាល់នៃជំងឺទឹកនោមផ្អែមលើទំនាក់ទំនង និងបញ្ហាទូទៅដែលអាចកើតឡើង នឹងជួយអ្នកគ្រប់គ្រងគ្រាលំបាកក្នុងទំនាក់ទំនងរបស់អ្នកកាន់តែប្រសើរឡើង។

១. ឥទ្ធិពលនៃជំងឺទឹកនោមផ្អែមលើទំនាក់ទំនងគ្រួសារ

ការ​ប្រកួត​ប្រជែង​រវាង​បងប្អូន​បង្កើត

• តើ​ជំងឺ​ទឹក​នោម​ផ្អែម​មាន​ឥទ្ធិពល​យ៉ាង​ណា​ចំពោះ​ទំនាក់​ទំនង ជា​ពិសេស​ក្នុង​ចំណោម​បង​ប្អូន? អ្នកមាន​ជំងឺ​ទឹកនោមផ្អែម​ប្រភេទ​​ 1 អាច​ទទួល​បាន​ការ​យក​ចិត្ត​ទុក​ដាក់​បន្ថែម​ពីប៉ាម៉ាក់ ​នៅពេល​ទៅ​ជួបគ្រូ​ពេទ្យ និង​ការ​មើល​ថែ​ទាំ​។ បងប្អូនបង្កើតរបស់អ្នក អាចមានអារម្មណ៍ថាត្រូវបានបោះបង់ចោល ឬមិនសប្បាយចិត្តដោយសារតែរឿងនេះ។

• អ្នកអាចមានអារម្មណ៍ថាមិនស្មើភាព នៅពេលដែលសមាជិកគ្រួសារតឹងរ៉ឹងជាមួយអ្នក ដូចជារឹតត្បិតអ្វីដែលអ្នកញ៉ាំ និងអ្វីៗផ្សេងទៀតដែលអ្នកត្រូវធ្វើ ដើម្បីគ្រប់គ្រងជំងឺទឹកនោមផ្អែមប្រភេទ1 ឲ្យបានល្អ។ ព្យាយាមចងចាំថា ទង្វើទាំងអស់នេះ កើតចេញពីក្តីស្រឡាញ់ ហើយពួកគេចង់ឱ្យអ្នកមានសុខភាពល្អ និងមានភាពរីករាយ។

• គួរឲ្យបងប្អូនរបស់អ្នកចូលរួមនៅក្នុងការគ្រប់គ្រងជំងឺទឹកនោមផ្អែមប្រភេទ1 របស់អ្នក ហើយឲ្យពួកគេទៅមន្ទីរពេទ្យជាមួយអ្នក ដើម្បីបង្កើតភាពរីករាយបន្ថែមទៀត! នេះអាចជួយកាត់បន្ថយផលប៉ះពាល់នៃជំងឺទឹកនោមផ្អែមលើទំនាក់ទំនងគ្រួសារ។

• គួរណែនាំ​ពួកគេ​អំពី​វេបសាយ HelloType1 និងទំព័រហ្វេកប៊ុក! ធ្វើដូច្នេះ ទើប​ពួកគេ​អាច​យល់​ពី​ជំងឺ​ទឹកនោមផ្អែម​ប្រភេទ 1 ​​កាន់តែ​ច្បាស់ និង​ឥទ្ធិពល​ដែលជំងឺមួយនេះ​មានមកលើ​អ្នក​។

រស់នៅឆ្ងាយពីប៉ាម៉ាក់

• ការ​រស់នៅ​បែក​គ្នា​ពីប៉ាម៉ាក់ អាច​ជា​រឿងពិបាកសម្រាប់អ្នករាល់គ្នា។ វាអាចពិបាកក្នុងការគ្រប់គ្រងលើការអនុវត្ត និងអារម្មណ៍។

• ត្រូវប្រាកដថា អ្នកមានថ្នាំ/ឧបករណ៍គ្រប់គ្រងជំងឺទឹកនោមផ្អែមទាំងអស់របស់អ្នកនៅជាប់ខ្លួន។ កុំភ្លេចយកទៅផ្ទះជាមួយ។ ប៉ាម៉ាក់របស់អ្នក អាចជួយអ្នកបានក្នុងកិច្ចការមួយនេះ។

• តាមដានការពិនិត្យជាតិស្ករក្នុងឈាម និងកម្រិតអាំងស៊ុយលីនរបស់អ្នកនៅក្នុងកំណត់ហេតុប្រចាំថ្ងៃ ដើម្បីឱ្យប៉ាម៉ាក់របស់អ្នកទទួលបានមានព័ត៌មានត្រឹមត្រូវ។

គ្រួសារ​ដែល​មាន​សមាជិក​ច្រើន

• នៅពេល​ដែលអ្នកកើត​ជំងឺ​ទឹកនោម​ផ្អែម​ប្រភេទ​​ 1 តាយាយ មីង និង​ពូ​ក៏ពិបាក​ចិត្ត និង​ព្រួយបារម្ភ​ផងដែរ​! កត្តានេះ អាចជួយកាត់បន្ថយផលប៉ះពាល់អវិជ្ជមាននៃជំងឺទឹកនោមផ្អែមលើទំនាក់ទំនងគ្រួសារបាន។

• សមាជិកគ្រួសារមួយចំនួនអាចមានការភ័ន្តច្រឡំ ថាតើអ្វីទៅជាជំងឺទឹកនោមផ្អែមប្រភេទ 1 ហើយមានន័យយ៉ាងណា ជាពិសេសប្រសិនបើពួកគេស្ថិតក្នុងជំនាន់/វប្បធម៌ផ្សេងគ្នា។

• គួរណែនាំពួក​គាត់​អំពី​វេបសាយ HelloType1 និងទំព័រហ្វេកប៊ុក! ដូច្នេះ ពួកគេអាចអាន ឬស្តាប់ ដើម្បីស្វែងយល់អំពីជំងឺទឹកនោមផ្អែមប្រភេទ 1 និងស្ថានភាពជំងឺរបស់អ្នក។

• ជួនកាល ការអប់រំ​អ្នក​រាល់​គ្នាឲ្យយល់ពីជំងឺទឹកនោមផ្អែម គឺជារឿងដ៏ហត់នឿយមួយ ដូច្នេះ​អ្នក​អាច​ប្រើ HelloType1 ដើម្បី​ជួយ​ក្នុង​ការ​ងារនេះ!

២. ឥទ្ធិពលនៃជំងឺទឹកនោមផ្អែមលើទំនាក់ទំនងផ្សេងទៀត

ទំនាក់ទំនងស្នេហា

• ទោះជាមានបញ្ហាសុខភាពណាមួយ ដូចជាជំងឺទឹកនោមផ្អែមប្រភេទ 1 ក៏យើងនៅតែអាចមានការណាត់ជួប ឬមានទំនាក់ទំនងស្នេហាបានដែរ។

• គួរមានភាពស្មោះត្រង់ជាមួយដៃគូរបស់អ្នកអំពីស្ថានភាពរបស់អ្នក ប្រតិកម្មរបស់ពួកគេអាចប្រាប់អ្នក ឲ្យដឹងថាតើពួកគេសាកសមនឹងអ្នកដែរឬអត់។

• គួររកដៃគូណាដែលបើកចំហរចំពោះការរៀនអំពីជំងឺទឹកនោមផ្អែមប្រភេទ 1 ហើយអាចយល់បាន។ ពួកគេអាចគាំទ្រអ្នកក្នុងការគ្រប់គ្រងជំងឺទឹកនោមផ្អែមប្រភេទ1។ នេះគឺជាវិធីមួយ ក្នុងការគ្រប់គ្រងផលប៉ះពាល់នៃជំងឺទឹកនោមផ្អែមលើទំនាក់ទំនង។

• គួរឲ្យពួកគេទៅជាមួយនៅពេលមានការរណាត់ជួបនៅមន្ទីរពេទ្យ ហើយណែនាំវេបសាយ HelloType1 និងទំព័រហ្វេកប៊ុក ដើម្បីឲ្យពួកគេចូលរួមក្នុងការគ្រប់គ្រងជំងឺទឹកនោមផ្អែមប្រភេទ1 របស់អ្នក។

• អ្នក​អាច​រៀប​ការ និង​បង្កើត​គ្រួសារ​ដូច​អ្នក​ដទៃបាន ប្រសិនបើអ្នកចង់!

មិត្តភក្តិ

• ទោះជាមាន​ជំងឺ​ទឹក​នោម​ផ្អែម​ប្រភេទ​​ 1 ក៏​អ្នកនៅតែអាចរាប់អាន​មិត្តភ័ក្ភ និង​ចូល​រួម​ក្នុង​កម្មវិធី​សង្គម និង​សកម្មភាព​សប្បាយៗ​បានដែរ!

• ការបង្ហាញភាពស្មោះត្រង់ជាមួយមិត្តភ័ក្តិ មានសារៈសំខាន់ណាស់ ហើយប្រតិកម្មរបស់ពួកគេចំពោះអ្នកដែលមានជំងឺទឹកនោមផ្អែមប្រភេទ 1 នឹងបង្ហាញឲ្យអ្នកដឹងថា តើពួកគេនឹងក្លាយជាមិត្តល្អ ឬអត់។

• គួរប្រាប់មិត្តភក្តិជិតស្និទ្ធរបស់អ្នកអំពីការគ្រប់គ្រងជំងឺទឹកនោមផ្អែមប្រភេទ 1 ពួកគេអាចជួយអ្នកបាន! ពួកគេមានការយល់ដឹង និងគាំទ្រអ្នកជានិច្ច។

• គួរណែនាំពីវេបសាយ HelloType1 និងទំព័រហ្វេកប៊ុក ដើម្បីអប់រំ និងឲ្យពួកគេចូលរួមក្នុងការគ្រប់គ្រងជំងឺទឹកនោមផ្អែមប្រភេទ1 របស់អ្នក។

• ទោះបីជាមានជំងឺទឹកនោមផ្អែមប្រភេទ 1 ក៏ដោយ ក៏អ្នកនៅតែអាចមានសុខភាពល្អ មានសុភមង្គល និងមានទំនាក់ទំនងល្អជាមួយគ្រួសារ មិត្តភក្តិ និងដៃគូស្នេហារបស់អ្នកបានដែរ។

• ចូរចងចាំថា ត្រូវសុំជំនួយ និងទទួលយកការគាំទ្រពីក្រុមគ្រួសារ មិត្តភក្តិ ដៃគូ និងក្រុមគ្រូពេទ្យរបស់អ្នក។ ការធ្វើបែបនេះ អាចកាត់បន្ថយស្រ្តេស និងកាត់បន្ថយបន្ទុកបានមួយចំណែក។ អ្នក​មិន​នៅឯកា​ទេ។"