១. ទំនាក់ទំនងផ្នែកសុខភាព រវាងជំងឺទឹកនោមផ្អែមប្រភេទ 1 និងលំហាត់ប្រាណ

• លំហាត់ប្រាណ មានអត្ថប្រយោជន៍ និងសារៈសំខាន់សម្រាប់សុខភាព និងសុខុមាលភាពផ្លូវចិត្តរបស់មនុស្សយើងគ្រប់រូប។ នៅពេលដែលអ្នករស់នៅ​ជាមួយ​ជំងឺទឹកនោមផ្អែមប្រភេទ 1 សកម្ម​ភាព​ទាំង​នេះ​កាន់តែមានសារៈសំខាន់ទៅទៀត ព្រោះវាជួយធ្វើឱ្យការគ្រប់គ្រងជាតិស្ករក្នុងឈាមរបស់អ្នកប្រសើរឡើង។

• សូមអានបន្ថែមអំពីការធ្វើលំហាត់ប្រាណ និងផលប៉ះពាល់លើជំងឺទឹកនោមផ្អែមប្រភេទ 1 នៅទីនេះ។

• ការយល់ឃើញខុសជា​ទូទៅមួយគឺថា ជំងឺទឹកនោមផ្អែមប្រភេទ1 និងការធ្វើលំហាត់ប្រាណមិនពាក់ព័ន្ធនឹងគ្នាទេ។ ប៉ុន្តែការពិតទៅ អ្នករស់​នៅ​ជា​មួយ​ជំងឺទឹកនោមផ្អែមប្រភេទ1 មិនត្រូវបានដាក់កំហិត មិនឲ្យហាត់ប្រាណនៅខាងក្រៅ និងចូលរួមលេងកីឡានោះទេ។ សកម្មភាពទាំងនេះ អាចជួយអ្នកក្នុងការបង្កើតមិត្ភភក្តិថ្មីៗ ស្វែងរកចំណាប់អារម្មណ៍ថ្មីៗ ក៏ដូចជាស្វែងយល់ពីកន្លែងថ្មីៗ។

• ប្រសិនបើមានការ​រៀបចំ​ល្អ​ និង​យល់ដឹង​ពី​រឿងដែល​ត្រូវ​ប្រុងប្រយ័ត្ន​ នោះអ្នកអាចរីករាយនឹងការលេងកីឡា ក៏ដូចជាសកម្មភាពខាងក្រៅ ព្រមទាំងទទួលបានអត្ថប្រយោជន៍នៃការធ្វើលំហាត់ប្រាណសម្រាប់ជំងឺទឹកនោមផ្អែមប្រភេទ 1។

២. ជំងឺទឹកនោមផ្អែមប្រភេទ 1 និងលំហាត់ប្រាណ៖ ការត្រៀមខ្លួនក្នុងការបញ្ចេញសកម្មភាពរាងកាយ

• គួរប្រាប់គ្រូបង្វឹក ឬមិត្តភ័ក្តិរបស់អ្នកថា អ្នកមានជំងឺទឹកនោមផ្អែមប្រភេទ 1 ហើយត្រូវប្រាកដថា ពួកគេដឹងពីអ្វីដែលត្រូវធ្វើ ក្នុងករណីដែលអ្នកមានជាតិស្ករក្នុងឈាមទាប (ចុះជាតិស្ករ) / ជាតិស្ករក្នុងឈាមឡើងខ្ពស់ (ឡើងជាតិស្ករខ្ពស់) ។

• អ្នកក៏អាចចែករំលែកចំណេះដឹងអំពី HelloType1 ដើម្បីអប់រំពួកគេផងដែរ!

• គួរធ្វើតេស្តជាតិស្ករក្នុងឈាមរបស់អ្នក នៅមុនពេលបញ្ចេញសកម្មភាព និងធ្វើតេស្តឲ្យទៀងទាត់ នៅអំឡុងពេលបញ្ចេញសកម្មភាពទាំងមូល។

• អាចញ៉ាំអាហារសម្រន់បាន បើអ្នកចង់ញ៉ាំ

• ខ្ចប់អាហារសម្រន់ និងភេសជ្ជៈបន្ថែម រួមទាំងអេឡិចត្រូលីត (នំ Granola bar ភេសជ្ជៈសម្រាប់អ្នកលេងកីឡា ឬទឹកដូង)

• ត្រូវប្រាកដថា អ្នកបានយកឧបករណ៍បញ្ចុះជាតិស្ករ និងឧបករណ៍សង្គ្រោះបឋមរបស់អ្នកដាក់តាមខ្លួន។ ពាក់ស្រោមជើងដែលធ្វើពីកប្បាស និងស្បែកជើងកីឡាដែលល្មមជើង និងមានផាសុកភាព។

• រឿងមួយទៀតដែលត្រូវគិតគូអំពីជំងឺទឹកនោមផ្អែមប្រភេទ1 និងការធ្វើលំហាត់ប្រាណគឺថា ការហាត់ប្រាណរយៈពេលយូរ អាចត្រូវការកាបូអ៊ីដ្រាតបន្ថែម និង/ឬការថយចុះកម្រិតអាំងស៊ុយលីន។ ចូរពិភាក្សាអំពីរឿងនេះជាមួយគ្រូពេទ្យ ឬគិលានុបដ្ឋាយិការបស់អ្នក។

• រក្សាអាំងស៊ុយលីននៅសីតុណ្ហភាពត្រឹមត្រូវ។ សូមអានបន្ថែមនៅទីនេះ

• ប្រសិនបើក្តៅ គួរលាបក្រែមការពារកម្តៅថ្ងៃ ឬពាក់មួកបើចាំបាច់ គួរពាក់អាវការពារ និងមានខ្យល់ចេញចូល។

• ប្រសិនបើត្រជាក់ អាចស្លៀកសម្លៀកបំពាក់ច្រើនជាន់បន្តិច និងរក្សាកម្តៅ​រាងកាយ។

• ត្រូវដឹងពីរោគសញ្ញានៃការចុះជាតិស្ករ និងឡើងជាតិស្ករ ជាពិសេសអំឡុងពេលធ្វើលំហាត់ប្រាណរយៈពេលយូរ។

• សូមអានបន្ថែមនៅទីនេះ ដើម្បីគ្រប់គ្រងការចុះជាតិស្ករក្នុងឈាម និងលើសជាតិស្ករក្នុងឈាម។

៣. ការក្រើនរំឭកសំខាន់ៗ បន្ទាប់ពីការបញ្ចេញសកម្មភាពរាងកាយ

• ក្រោយបញ្ចេញសកម្មភាពរាងកាយរួច ចូរពិនិត្យមើលថាតើ វាប៉ះពាល់ដល់កម្រិតជាតិស្ករក្នុងឈាមរបស់អ្នកយ៉ាងដូចម្តេច ហើយគួរកែតម្រូវអាំងស៊ុយលីន ប្រសិនបើចាំបាច់។

• ក្រោយបញ្ចេញសកម្មភាពរាងកាយរួច ចូរពិនិត្យមើលជើងរបស់អ្នក រកមើលដំបៅ ពងបែក រលាត់ ស្នាមដាច់រលាត់ ឬរបួសផ្សេងទៀត។

• ដើម្បី​ឱ្យ​ជើងស្អាត​ក្រោយ​ពេល​ហាត់ប្រាណរួច (គួរ​លាង​ជើង ទុក​ឱ្យ​ស្អាត និង​ស្ងួត លាប​ឡេ​តិចតួចបើ​ចាំបាច់​ ដើម្បី​ចៀសវាងការរង​របួស)

• ចូរទាក់ទងទៅកាន់គ្រូពេទ្យ បើរបួសមិនជាសះស្បើយក្រោយរយៈពេលពី 2 ថ្ងៃ។

• ការធ្លាក់ចុះជាតិស្ករក្នុងឈាម អាចកើតមានឡើងយឺតយ៉ាវ ដោយធ្លាក់ចុះក្នុងរយៈពេល 6 ទៅ 15 ម៉ោង បន្ទាប់ពីការហាត់ប្រាណរួច។

• ប្រសិនបើកម្រិតជាតិស្ករក្នុងឈាមរបស់អ្នកបន្តធ្លាក់ចុះ បន្ទាប់ពីការហាត់ប្រាណរួច អ្នកប្រហែលជាត្រូវបន្ថយកម្រិតអាំងស៊ុយលីននៅមុន និងក្រោយពេលហាត់ប្រាណ។ គួរស្នើសុំជំនួយពីគ្រូពេទ្យ ឬគិលានុបដ្ឋាយិការបស់អ្នក។

៤. កត្តាផ្សេងៗ ដែលត្រូវគិតគូនៅពេលធ្វើលំហាត់ប្រាណ

• ប្រភេទ អាំងតង់ស៊ីតេ និងរយៈពេលនៃការធ្វើលំហាត់ប្រាណ (សូមមើលតារាងខាងក្រោម)

• បរិមាណអាំងស៊ុយលីនដែលនៅសល់ក្នុងខ្លួនរបស់អ្នក (ពេលវេលាចាក់អាំងស៊ុយលីនចុងក្រោយ)

• ពេលវេលា និងសមាសភាពនៃអាហារចុងក្រោយ

• គ្លុយកូសក្នុងឈាមមុនពេលហាត់ប្រាណ (ជាទូទៅចាប់ពី 7 - 10 មីលីម៉ូល/លីត្រ ឬ 126 – 180 មីលីក្រាម/ដេស៊ីលីត្រ) 1

• កម្រិតភាពមាំទាំរបស់អ្នក

  

• អ្នក​រស់​នៅ​ជាមួយ​​ជំងឺ​ទឹក​នោម​ផ្អែម​ប្រភេទ 1 មាន​ប្រតិកម្ម​ខុស​គ្នា​នឹង​ការ​ហាត់​ប្រាណ និង​អាំងស៊ុយលីន ដូច្នេះហើយ គួរស្គាល់ពី​រាង​កាយ​របស់​អ្នកឲ្យបានច្បាស់លាស់!

• ការប្រែប្រួលនៃជាតិស្ករក្នុងឈាមអំឡុងពេល និងក្រោយពេលធ្វើលំហាត់ប្រាណ គឺជារឿងធម្មតាប៉ុណ្ណោះ។

• អនុវត្ត ពិសោធន៍ និងធ្វើការកត់ត្រាទុក។ គួរស្វែងយល់ពីការប្រែប្រួលលើរាងកាយរបស់អ្នក នៅអំឡុងពេល និងក្រោយពេលលេងកីឡា ក៏ដូចជាធ្វើសកម្មភាពខាងក្រៅ។ ទាំងនេះគឺជារឿងរ៉ាវសំខាន់ ដែលត្រូវគិតគូ នៅពេលនិយាយអំពីជំងឺទឹកនោមផ្អែមប្រភេទ 1 និងការធ្វើលំហាត់ប្រាណ។

• គួរធ្វើការពិនិត្យ និងពិភាក្សាជាទៀងទាត់ជាមួយគ្រូពេទ្យ ឬគិលានុបដ្ឋាយិការបស់អ្នក។

• អ្នកនឹងសិក្សា ក៏ដូចជាអាចរក្សាលំនឹងជាតិស្ករក្នុងឈាមរបស់អ្នក ស្របពេលដែលកំពុងទទួលបានភាពសប្បាយរីករាយ ក៏ដូចជាអត្ថប្រយោជន៍នៃការហាត់ប្រាណ។