វដ្ដរដូវនិង​កម្រិតជាតិស្ករក្នុងឈាម៖ អំឡុងពេលនេះ តើ​រាងកាយ​យើង​មានការប្រែប្រួលអ្វីខ្លះ?

ចំពោះមនុស្សស្រី ដល់​វ័យបន្តពូជ មានឈាម​រដូវ ឬមានរដ្ដរដូវទៀងទាត់ ជា​រឿងចៀងមិនផុត​ពី​ដំណើរ​ធម្មជាតិ ប៉ុន្តែ​ចំណុចគួរពិចារណា​ត្រង់ថា ​យើង​ក៏កំពុងរស់នៅជាមួយ​ទឹកនោមផ្អែម។ ​ចំណុចគួរ​កត់សម្គាល់ គឺ​កម្រិតជាតិស្ករ​ក្នុងឈាម​អាច​ឡើងខ្ពស់ ក្នុងកំឡុងពេលណាមួយនៃខែក្នុងកំឡុងវដ្តរដូវរបស់អ្នក។ បើយើង​ចាប់ផ្ដើម​ចំណាំទៅ ពិតជាជាតិស្ករឡើងមែន មិនមែនជា​រឿងចៃដន្យទេ ប៉ុន្តែនេះជា ​រឿងត្រូវដឹង​ថា ការ​មករដូវពិតជា​ចំណែក​ធ្វើ​ឲ្យ​បរិមាណជាតិស្ករយើង​ឡើង​ខ្ពស់​ខុសពីធម្មតា។

តោះ! បន្ត​ស្វែងយល់​ឲ្យ​ល្អិតល្អន់ជាងនេះ ជាមួយគ្នា។ ពេលមករដូវ តើរាងកាយ​យើង​ឆ្លើយតបបែបណា? នេះជា​ដំណាក់កាល ៤ សំខាន់ៗ​រដ្ដរដូវមនុស្សស្រី​ចាប់ផ្ដើមមក៖

១. ដំណាក់កាលមករដូវ៖ នេះជាពេលដែលរដូវរបស់មនុស្សស្រី​ចាប់ផ្តើមមក។ កម្រិតអ័រម៉ូនស្ថិតនៅកម្រិតទាប ហើយកម្រិតជាតិស្ករក្នុងឈាមអាចចាប់ផ្តើមមានលំនឹងល្អ មិនទាន់ប្រែប្រួលធំដុំទេ។

២. ដំណាក់កាលហ្វូឡេគុល៖ ក្នុងដំណាក់កាលនេះ អ័រម៉ូនអេស្ត្រូហ្សែនកើនឡើង ដែលជួយឲ្យរាងកាយប្រើអាំងស៊ុយលីនបានប្រសើរជាងមុន។ ក្នុងដំណាក់កាលនេះ ​គ្នាយើងខ្លះ​មិនឃើញមាន​កើតមានផលលំបាកអ្វីនៅឡើយទេ បានន័យថា​កម្រិតជាតិស្ករនៅ​តែ​អាច​គ្រប់គ្រងល្អធម្មតា។

៣. ដំណាក់កាលបញ្ចេញអូវុល​៖ ​រាងកាយស្ត្រីដល់ពេល​បញ្ចេញពងសម្រាប់​បង្កកំណើត។ គ្នាយើង​ភាគច្រើន​អត់​បាន​ចាប់​អារម្មណ៍ ឬអត់​បាន​​សង្កេតឃើញពី​ការផ្លាស់ប្តូរធំដុំទេ ព្រោះ​ពេលនេះ ជា​ពេល​ដែល​​ជាតិស្ករក្នុងឈាមចាប់ផ្ដើម​ប្រែប្រួលគួរ​ឲ្យ​កត់សម្គាល់។

៤. ដំណាក់កាលលូទីអាល់៖ ដល់ដំណាក់កាល​ពិបាកហើយ។ នេះ​ជា​ពេលវេលា​ដែល​អ័រម៉ូនប្រូជេស្តេរ៉ូនកើនឡើង ធ្វើឲ្យ​ការគ្រប់គ្រងជាតិស្ករក្នុងឈាមកាន់តែពិបាក។ ជាតិស្ករក្នុងឈាមហក់​ឡើង​ខ្ពស់ជាងធម្មតា​ រាងកាយ​ទទួល​​អារម្មណ៍នឿយហត់ ឆាប់​ឃ្លាន​ ឬអារម្មណ៍ប្រែប្រួលនិង​បង្ក​ផលរំខាន។ ដំណាក់កាលនេះអាចបន្តប្រហែល ២​សប្ដាហ៍ មុនពេលវដ្តរដូវថ្មី​ចាប់ផ្តើមឡើងវិញ។

T1D អ័រម៉ូន និង​អាំងស៊ុយលីន៖ ​ផលប៉ះពាល់ដល់​បញ្ហា​ទឹកនោមផ្អែម​អំឡុងពេលមករដូវ

មិន​ថា​អ្នកដែល​កំពុងរស់នៅជាមួយ​ទឹកនោមផ្អែមប្រភេទ១ ឬ​ប្រភេទ២ ទេ រាងកាយ​អ្នកទាំងនោះ​នឹងឆ្លើយតបផ្សេងៗ​គ្នាទៅ​នឹង​បម្រែបម្រួល​អ័រម៉ូន។ នោះ​បានន័យ​ថា ​បរិមាណ ឬ​កម្រិត​អាំងស៊ុយលីនដែល​ធ្លាប់​តែ​ចាក់អាចផ្តល់លទ្ធផលខុសគ្នាទៅតាមដំណាក់កាលនៃវដ្តរដូវរបស់យើង។

មានទឹកនោមផ្អែមប្រភេទទី ១ អាចប៉ះពាល់ដល់វដ្តរដូវដូចជា៖

• រដូវមកមិនទៀង​​​

• អូវុលសម្រាប់បង្កកំណើត​មិនធ្លាក់

• មករដូវយឺតជាងធម្មតា

• ឆាប់អស់រដូវ

ការ​ផ្លាស់ប្ដូរ​ទាំង​នេះ គឺ​ជា​ផលលំបាក​ដែល​បណ្ដាល​មក​ពី​ឥទ្ធិពល​របស់​ទឹកនោមផ្អែមបង្កឡើង​ពេលដែល​រាងកាយយើង​ប្រែប្រួល​កម្រិត​អ័រម៉ូនដូចពន្យល់​ពី​ខាង​ដើម។

ការកែតម្រូវបរិមាណអាំងស៊ុយលីននិងគ្រប់គ្រងកម្រិតជាតិស្ករក្នុងឈាម​អំឡុងពេលមករដូវ

១. កត់ត្រាឲ្យល្អិតល្អន់ច្បាស់លាស់កុំរំលង៖ សូម​ប្រើប្រាស់​កម្មវិធីតាមដានវដ្តរដូវរួមជាមួយកំណត់ត្រាជាតិស្ករក្នុងឈាម ដើម្បីបង្ការ​ការភ្លាំងភ្លេច។ ការ​កត់ចំណាំវាចូលគ្នាបែបនេះ ​នឹងជួយយើងឲ្យ​​ឃើញពី​លំនាំ​ប្រែប្រួល និងដឹងថាពេលណាគួរកែតម្រូវកម្រិត​អាំងស៊ុយលីន អាហារ ឬសកម្មភាពផ្សេងៗ​ប្រចាំថ្ងៃ។

២. យកចិត្តទុកដាក់ខ្ពស់​និង​អាទិភាព​ចំពោះខ្លួនឯង៖ ​បើទ្រនិចប្រដាប់វាស់​ជាតិ​ស្ករក្នុងឈាមហក់ឡើងខ្ពស់​មុនពេលមករដូវ បានន័យ​ថា​អ្នកគ្រប់គ្រងជាតិស្ករ ឬ​របបអាហារ​បានល្អហើយ ​សូមកុំបន្ទោសខ្លួនឯង ព្រោះ​នេះជាពេល​កំពុង​មករដូវ អ័រម៉ូនប្រែប្រួល ជាហេតុ​ធ្វើ​ឲ្យ​ជាតិស្ករ​ផ្លាស់ប្ដូរហើយ​ហក់ឡើង​ខ្ពស់ខុសធម្មតា។

៣. ពិគ្រោះជាមួយគ្រូពេទ្យជាប្រចាំ៖ បើ​មានអារម្មណ៍ថាពិបាកគ្រប់គ្រងកម្រិតជាតិស្ករ​ កុំភ្លេចរឿងមុនគេ​គឺ​​ទាក់ទងទៅ​គ្រូពេទ្យ ឬ​វេជ្ជបណ្ឌិតដែលដឹងពីស្ថានភាព​រាងកាយអ្នក​ជាប្រញាប់។ គ្រូពេទ្យដែល​ដឹង​ពី​ស្ថានភាព​រាងកាយយើង ​នឹង​ជួយកែសម្រួលផែនការថែទាំឲ្យបានល្អជាងនេះ។

៤. បង្កើតបណ្ដាញគាំទ្រផ្ទាល់ខ្លួន៖ អាច​ព្យាយាម​ចែករំលែកជាមួយមិត្តភក្តិ ឬ​អ្នកផ្សេងទៀតដែលរស់នៅជាមួយជំងឺទឹកនោមផ្អែមដូចគ្នា។ ការផ្លាស់ប្ដូរ​បទពិសោធន៍ ជារឿងល្អ​មិនត្រឹមតែផ្តល់ចំណេះដឹងទេ ប៉ុន្តែថែមទាំងជួយ​ឲ្យយើងមានអារម្មណ៍ថាកក់ក្ដៅ ​មិនឯកា។

ថែទាំនិងគ្រប់គ្រងទឹកនោមផ្អែម ពេលមករដូវ

ការ​មក​រដូវ ឬខែថ្ងៃ ជាទូទៅ​ពាក់ព័ន្ធគ្នាជាមួយ​កម្រិតជាតិស្ករក្នុងឈាម​មិន​អាច​កាត់​ផ្ដាច់បាន​លើស​ពី​យើងគ្រប់គ្រងនឹកស្មាន។ ការ​ស្វែងយល់​ពី​រាងកាយ​ច្បាស់លាស់​ល្អ ជា​កត្តាជោគជ័យជួយឲ្យ​សុខភាពល្អប្រសើរ។ ​ត្រូវហើយ គិតទៅ​ហាក់លំបាក ប៉ុន្តែអ្នកណាក៏​អ៊ីចឹងដែរ ត្រូវអត់? មិនមែន​តែ​យើង​ម្នាក់ឯណា​ ដែល​ដាច់​ខាត​ត្រូវតែ​ខំជម្នះឲ្យ​ខាង​តែបាន។ ខំបន្តទៀតណា៎ កុំបោះបង់។