ប្រយ័ត្នខូចតម្រងនោម! ទាំងនេះជាវិធីថែទាំសម្រាប់អ្នកជំងឺទឹកនោមផ្អែមប្រភេទ១

កែសម្រួលដោយ: 17.03.2025

Anne-Charlotte Ficheroulle

Pharmacist, Digital Innovation Manager, A4D

១. ផលវិបាកជំងឺទឹកនោមផ្អែមលើតម្រងនោម

ជំងឺទឹកនោមផ្អែមអាចធ្វើឲ្យខូចតម្រងនោមរបស់យើងបាន ដោយជំងឺនេះធ្វើឲ្យតម្រងនោមពិបាកក្នុងការចម្រោះជាតិទឹកនិងកាកសំណល់ផ្សេងៗចេញពីរាងកាយ។ បញ្ហានេះកើតឡើងដោយសារតែការឡើងខ្ពស់កម្រិតជាតិស្ករក្នុងឈាម និងសម្ពាធឈាមខ្ពស់។ បញ្ហានេះគេឲ្យឈ្មោះថាការខូចតម្រងនោមដោយជំងឺទឹកនោមផ្អែម(diabetic nephropathy) ឬជំងឺតម្រងនោម(kidney disease)។
នៅដំណាក់កាលដំបូងៗជំងឺតម្រងនោម មិនមានចេញរោគសញ្ញានោះទេ ប៉ុន្តែយូរៗទៅវានឹងធ្វើឲ្យតម្រងនោមចុះខ្សោយ។ ដូចនេះនៅពេលមួយតម្រងនោមនឹងឈប់ដំណើរការ ហើយការលាងឈាមនឹងត្រូវតែធ្វើ ដើម្បីលាងសម្អាតឈាម ជំនួសឲ្យតម្រងនោមដែលខូច មិនអាចសម្អាតឈាមបានដូចមុន។ ដូចនេះហើយ បានជាយើងចាំបាច់ត្រូវតាមដានឲ្យបានដឹងទាន់ពេលវេលាពីជំងឺតម្រងនោម ព្រោះថាពេលខ្លះយើងអាចបញ្ចៀសការខូចខាតនេះបាន។

២. វិធីតាមដានជំងឺតម្រងនោម

ដូចបាននិយាយពីខាងលើអ៊ីចឹង ជួនកាលជំងឺតម្រងនោមមិនមានចេញរោគសញ្ញាអ្វីទេនៅដំណាក់កាលដំបូងៗ។ ដូចនេះហើយ យើងចាំបាច់ត្រូវទៅពិនិត្យតម្រងនោមឲ្យបានទៀងទាត់រាល់ឆ្នាំ។
ដើម្បីតាមដានពីជំងឺតម្រងនោម គ្រូពេទ្យនឹងពិនិ្យលើកម្រិត albumin (ប្រូតេអ៊ីនម្យ៉ាងផលិតដោយថ្លើម) នៅក្នុងទឹកនោម និងពិនិត្យគំរូ creatinin ក្នុងឈាមរបស់យើង ដើម្បីដឹងបានថាតម្រងនោមនៅមានសុខភាពល្អកម្រិតណា។ ឆ្លងតាមរយៈការធ្វើតេស្តលើចំណុចទាំងពីរនេះ យើងនឹងអាចកំណត់បានច្បាស់ពីជំងឺតម្រងនោមបានរហ័ស និងអាចព្យាបាលកុំឲ្យជំងឺនេះវិវត្តទៅមុខលឿនពេក។
ក្នុងករណីជំងឺតម្រងនោមកំពុងតែវិវត្តទៅមុខហើយនោះ យើងនឹងមានចេញរោគសញ្ញាទាំងនេះ៖

ហើមកែងជើង ប្រអប់ជើង និងដៃ
នោមមានឈាម
អស់កម្លាំង
ដកដង្ហើមខ្លីៗ ឬញាប់
ចេះតែមិនស្រួលខ្លួន

យើងអាចមានចេញរោគសញ្ញាទាំងនេះ ដោយសារថាតម្រងនោមបានព្យាយាមសម្អាតទឹក (Fluid) និងកាកសំណល់ចេញពីរាងកាយ។ ប៉ុន្តែរោគសញ្ញាទាំងនេះ ក៏អាចបង្កឡើងដោយកត្តាផ្សេងៗទៀតដែរ។ ដូចនេះដើម្បីបានដឹងច្បាស់ យើងត្រូវពិភាក្សាជាមួយគ្រូពេទ្យ។